Real Madrid tan hna a awlsam

Carlo Ancelotti-a'n a player ṭha tam zawk hahchawlh tir mah se buaina an nei chuang lo - Real Madrid chuan fourth division club Deportiva Minera chu 5-0 a sawp chungin Copa del Rey last 16 an lut.

Thawhṭanni zan khan Estadio Municipal Cartagonova-ah Real Madrid an lenglut a, a hmunah entu 14,000 an awm - Real Madrid tan chuan a khawhar thlak zawk hial mai thei.

Spanish champion tan Federico Valverde-a'n goal a khung ṭan a, chumi hnuah Eduardo Camavinga-a'n belh chhahin rawlthar Arda Guler-a goal hnih leh, vanglai pel tawh Luka Modric-a goal kan hmu zui bawk.

Spanish Super Cup an khelh avangin Ancelotti naute hian Copa del Rey an la khel tam lo, vawi 20 an champion tawhna a nih avangin an mikhual lo a, season hmasa khan Atletico Madrid hneh loin last 16-ah an tla, kuminah champion an tum ang.

Deportiva Minera lakah hian Jude Bellingham chu hahchawlh tlua tir a ni a, bench aṭangin Vinicius Junior, Kylian Mbappe, Lucas Vazquez leh Dani Ceballos te an lut thung, team boruak a nung ṭha hle.

Kum 39 mi Modric chungchang sawiin Ancelotti chuan, "Ani hi chu football tana thilpek duhawm leh ṭha tak a ni. Match kan khelh tur a zir hian rilru leh taksa a lo inbuatsaih ṭhin a, final ang mai hian a ngaipawimawh ṭhin.

"Player zawng zawngin hetiang chu an thi thei lo, a ti thei bik kan nei hi a lawmawm. Real Madrid player chauh ni loin, hmun danga player naupang zawkte tan pawh entawn tlak a ni," tiin a sawi.

Real Madrid hian La Liga an khelh hmain match khelh tur dang an la nei. Janaury 9, Ningani zan dar 12:30 hian Mallorca nen Spanish Super Cup semifinal an khel ang.