Neuer-a'n contract pawtsei dawn

Manuel Neuer-a'n football chawlhsan mai a la tum lo. Kum 38 mi Neuer hian Bayern Munich-ah kum khat dang contract a ziah belh dawn a, club nena an indawrna a hlawhtling a nih chuan June 2026 thleng Allianz Arena-ah a cham dawn.

Neuer hian kum 2011 khan Schalke aṭangin Bayern hi a zawm a, Bundesliga nomawi 11 bakah DFB Pokal nomawi panga, Champions League nomawi pahnih, UEFA Super Cup nomawi pahnih leh FIFA Club World Cup nomawi pahnih a chawi tawh.

German goalkeeper Neuer hian Bavarians-ah hmun pawimawh a chang a, tun season-ah pawh match 19 a inlan tawh. Bayern hian Bundesliga-ah January 11, Inrinni zan hian Borussia Monchengladbach an mikhual dawn a, Thawhṭanni zan khan friendly match-ah RB Salzburg chu 6-0 in an sawp.