Antetokounmpo hoin Bucks an chak

Giannis Anteto-kounmpo awmna Milwaukee Bucks chuan nimin zing NBA inkhelah, an khingpui Toronto Raptors lakah 128-104 in hnehna an chang.

Greek tlangval hian point 11 a neih bakah rebound ṭum 12 lain a ṭhiante basket neih tur vawi 13 a siamsak a, basketball a khelh hun chhunga a vawi 49 nan triple double a nei a, a team chak nan a tawk.

Toronto-a inkhelah Damian Lillard chuan Bucks tan point 25 a nei bawk a, an match hnuhnung panga zinga pali ngawtah tlawm mah se, tunah chuan chak ni hmel an hmu ve leh ta.

Bucks coach Doc Rivers chuan, "Antetokounmpo khan kan zavai tan kawng a sial, player ṭha berin a hna ṭha taka a thawh chuan midang tan kawng a awlsam phah ṭhin, chutiang chu tun ṭumah khan kan hmu," tiin a sawi.

Nimin zing inkhel dangah Chicago Bulls chuan point 19 ngawta an hniam zawk hnuah, an khingpui San Antonio Spurs 114-110 in an hneh let. Sacramento Kings pawhin over time vawi hnih an khelh hnuah Miami Heat 123-118 in an hneh a; Detroit Pistons chuan Portland Trail Blazers 118-115 in an hneh bawk.