I League khel ṭan leh dawn

Thlasik chawlh hman hnuah vawiin aṭangin I League khelh ṭan leh a ni dawn. Vawiin chawhnu dar 1:00-ah Delhi leh Gokulam Kerala te an inkhel ang a, tlai dar 3:30-ah Churchill Brothers leh Namdhari te an inhmachhawn ang.

Tun season-ah R. Ramdinthara (Tharpuia) telna Gokulam-in tun season-ah beisei an pha lo a, match ruk an khelh tawhah vawi khat chiah la chakin point sarih an hmu tawh. Chutihrualin an khingpui tur Delhi pawh hian vawi hnih chiah hnehna an la chang a, Gokulam aiin point khat chauhin an hmu tam. Delhi-ah hian Mizo keeper Lalmuansanga, defender K. Lalmalsawma leh Lalbiakzuala bakah midfielder K. Vanlalhriatzuala leh forward Jakob Vanlalhlimpuia te an tel a ni.

Goan club Churchill erawhin season bul an ṭan ṭha a, match ruk aṭanga point 13 hmuin table chung berah an awm mek. Churchill-ah hian Mizo tlangval Lalliansanga Renthlei, Lalremruata Ralte leh Lalbiakhlua te an khel a, an khingpui tur Namdhari hi Mizo awm lohna a ni thung.