Inter hnehin Milan an champion

An hmelma an hneh a ni satliah lo a, goal hnih an phurh hmasak hnuah huaisen takin an tho chhuak - AC Milan chuan Inter Milan chu 3-2 a hnehin Italian Super Cup champion an ni.

Goal hnih an phurh hnuah bench aṭanga lut Rafael Leao a langsar. Theo Hernandez, Christian Pulisic leh Tammy Abraham te goal khung hoah Portuguese winger hi a inrawlh vek.

Thawhlehna chu

Cullman Alabama Skate Park, Riyadh, Saudi Arabia-a inkhelah Inter Milan an hlauhawm hmasa, chawlhlawk hma hretin Lautaro Martinez chuan Milan defender ten an hual vel karah an goal khatna a khung.

Second half tirah Mehdi Taremi chuan cool zetin an goal hnihna a khung, Iranian striker hian ball kang lai chu a ke a la thlain, goalkeeper Mike Maignan dan theih lohin a khung, a hmunruak a luahsak Marcus Thuram ai a awh zo hle.

Milan an tlawm duh bik lo, goal hnih an chhuah hnuah manager Sergio Conceicao chuan Alex Jimenez la chhuakin Leao a dahlut a, boruak a danglam - freekick hlawh chuakin Hernandez chuan a khung, beiseina an nei thar.

Mual sir aṭangin Leao a hlauhawm ṭhin a, a thawhrah sengtu Pulisic chuan chiang zetin an si phurh a sut zo a, an la duhtawk mai lo, hun tawp dawn thlengin na takin an nawr chhunzawm zel.

Hun tawp hma hretin Leao hian striker Abraham tan a siamsak zauh - England international hian chep angreng takah a hun ṭha a hlah duh bik lo, an chakna mai bakah nomawi chawi theihna ni bawk turin a khung.

Lungawina

AC Milan coach Sergio Conceicao chuan an naute khelh danah a lungawi tih a sawi a, danglamna thlentu Rafael Leao chu khawvela player ṭha berte zinga miah a chhuak thei tih a sawi bawk.

Conceicao chuan, "Hun chep tak karah a indawtin team ṭha pahnih kan hmachhawn, a nihna tak sawi chuan Italian Super Cup lak hi a harsa khawp mai, chutiang hlen chhuak thei player kan nei hi ka lawm.

"Ka naute khan hmasawn kan ngaihna leh siamṭhat ngai lai an hrechiang em em a, ka sawi leh duh ang takin an khel chhuak thei. Tuna kan result ṭha hian Champions League leh Serie A lamah pawh Milan nihna tak a lantir ngei ang," tiin a sawi.

Milan hian semifinal-ah Juventus chu 2-1 in an hneh bawk a, Old Lady an hneh ṭum hian an tan thil a awlsam loh thu leh a bik takin goal ven an uluk zual a ngai tih a sawi, a duh ang vekin thil thleng lo mah se, tun dinhmuna team ṭha zawka ngaih Inter an hneh.

Kan chesual

Goal hnih an hum thei lo a, inkhel thunun thei dinhmuna an din hnua an chetsualna chu Inter Milan coach Simone Inzaghi chuan pawm thiam harsa a ni a, an tihsual vanga chak lo an ni chu pawi a tih thu a sawi bawk.

Inter manager Inzaghi chuan, "A hmasa berah chuan champion AC Milan kan lawmpui tur a ni, a chhan chu goal hnih an chhuah hnuah pawh beidawng loa min beihletna kha fak an phu.

"2-1 a nih hnuah pawh khan team ṭha zawk chu kan la ni a, khung belh theihna remchang pawh kan hmu nual. Mahse, goal zawna kan hriam zui thei ta tlat lo kha a pawi, goal hnihna kan chhuah mai pawh ni loa goal thumna thlenga kan chhuah kha chu pawm a harsa.

"Match khelh tur kan ngah em em a, tun kar tawp leh kar leh laihawlah match kan nei zui leh nghal dawn. Hahchawlhna hun kan nei lo, season hautak lai kan tawng chho mek a ni," tiin a sawi. Serie A lamah Atalanta leh Napoli te hnuaiah an awm avangin an hna a hautak dawn.