Bournemouth-in Soler la lut dawn

Premier League club Bournemouth chuan defender ṭhangduang Julio Soler chu Argentine club Lanus aṭangin an la lut dawn a, he thuziak i chhiar meuh chuan an inla lut fel tawh hial mai thei.

Kum 19 mi defender man atan hian pound maktaduai 6.6-in an inrem a, a khelh ṭhat dan a zirin a man hi £11.5mtd thlenga sang chho thei tur a ni ang.

Soler hian April, 2022 khan senior team tana a match hmasa ber a khel ve chauh a, hetih chhung hian inelna hrang hrangah match 58 khelhsak hmanin, goal a khung lo a, assist vawi hnih a nei thung.

Paraguay-a piang left back Soler hian Argentina tan Under-20 leh U23-ah a khel tawh a, U20-ah hian captain dinhmun hial a chelh phak.

Tun season-a beisei phak baka che ṭha Bournemouth hi an phur hle. League match riat zet chu a zawnin an tlawm lo tawh a, vawi nga hnehna changin, vawi thum an khingpui an inhnehtawkpui.

Cherries-in an league match hnuhnung pariata an hneh zingah hian Tottenham Hotspur (1-0) leh Manchester United (3-0) an tel a, hemi hma hian Arsenal (2-0) leh Manchester City (2-1) te an lo hneh tawh bawk!

Premier League table-ah pasarihna dinhmun luah mekin, parukna Manchester City hi match 20 khelh tawhah point khat chauhin an phak lo mek - an phur vanglai tak a ni.