Tottenham Hotspur-in keeper Kinsky an la lut

Tun season Premier League-a beisei phak lo Tottenham Hotspur-in thlasik transfer an hmang ṭangkai nghal der a, Slavia Prague aṭangin goalkeeper Antonin Kinsky an la lut.

Kum 21 mi keeper hian kum 2031 thleng Spurs-a khel turin contract a ziak a, a man zat hi pound maktaduai 12.5 niin, a khelh ṭhat dan a zira a man hi la san belh leh thei tur a ni.

Spurs first-choice keeper Guglielmo Vicario chu November 23-a Manchester City an sawp ṭumin a inhliam a, hemi hnu hian a inlan leh tawh lo - February thleng chu a chawlh a ngai dawn.

Vicario awm loh hlan hian Fraser Forster chuan si ban a nghak ṭhin a, Spurs tan keeper mamawhna a sang hle. London club hian Kinsky hi second choice tura an lakluh a ni lo a, Vicario nen number 1 nih inchuha inel tura an lakluh a ni.

Jersey number 31 ha tur Kinsky chuan, "Europe-ah chuan Tottenham hi team lian tak an ni a, a bik takin Czech Republic-ah an lar em em a, anni ang club ka zawm thei hi ka tan chuan chawimawina a ni," a ti.

Kinsky hian Czech club ṭha Slavia Prague tan season hman mekah match 29 a khel tawh a, a pa Antonín Kinsky pawh a vanglaia goalkeeper ṭhin niin Czech Republic tan vawi nga a inlan hman.

Spurs keeper thar chuan, "Ka pa hi ka entawn ber a ni a, ka thutlukna siamah chuan a tel ve zel. Spurs zawm hi ka tana ṭha tur niin a hria a, ka zawm ta a ni," tiin EPL club a zawm chhan a sawi.