Ipswich Town-in Godfrey an hawh

Premier League club talbuai mek Ipswich Town-in thlasik transfer-ah squad thuamchak hna an thawk nghal a, defender Ben Godfrey chu Atalanta aṭangin loan-in an hawh.

Kum 26 mi defender hian Serie A club hi nipui transfer lai khan pound maktaduai 11 velin a zawm a, mahse, Serie A team hmuhnawm tan hian hmun a chang phak lo.

Tun season inelna hrang hrangah match nga chauh a la khel a, Serie A-ah phei chuan minute 22 bak a la inlan lo. England tana vawi hnih inlan tawh Godfrey chuan, "Ka team mate tharte nen inhmuh a, inkhelh ka châk tawh hle.

"Manager Kieran McKenna nena kan inbiaknain min tilawm hle a, a hnuaia player ka ni thei tur hi ka hlim a ni," a ti.

Centre back leh right back-ah pawh khel thei Godfrey hi English football-ah a mikhual lo hle. League Two club York City-ah a professional zinkawng zawh ṭanin, Norwich City leh Everton tan Premier League a khel tawh.

Norwich tana Championship nomawi chawi tawh defender hian English Football League-a league pali, League Two, League One, Championship leh EPL-ah te a khel vek tawh a ni!