Australian Open atan Sabalenka a inpeih

Aryna Sabalenka chuan a zawna a vawi thum nan Australian Open nomawi chawi ngei a tum a, tennis season khat chhunga Grand Slam hmasa ber hmachhawn tur hian a inpeih tawh tih a sawi chhuak.

Australian Open bikah chuan, kum 2022 khan fourth round-ah Kaia Kanepi a ngam lo a, a hnu lamah hneh loh a la tawng leh lo, kuminah pawh champion tura rinkai ber zinga mi a ni dawn.

Belarus nula Sabalenka chuan, "Kum tinin Australian Open khelh hi thil awlsam a ni ngai lo, a ṭha ber ni tur chuan a bul aṭanga a tawp thlengin tha thlah miah la beih leh a ngai dawn a ni.

"Mi ten kan laka beiseina an neih san chiah hian tournament khelh a hautak phah ṭhin a, chutihrual erawh chuan mi dangte rin ngam khawpa ṭha kan ni tih kan hriat ve a ngai bawk, kuminah hian inelna hmachhawn turin rilru leh taksa a inpeih tawh," a ti.

Australian Open 2025 hi qualifying an khel mek a, main draw chu January 14, Thawhṭani aṭangin Melbourne Park-ah an khel ṭan ang, player langsar leh a ṭha ber berte an inlan leh dawn a ni.