Villa-in Oscar Mingueza an duh

Premier League club Aston Villa pawhin thlasik transfer-ah an squad thuam chhah an tum a, Celta Vigo aṭanga right back Oscar Mingueza lakluh tumin an hel mek.

Kum 25 mi Mingueza hi Barcelona academy aṭanga inzir chhuak niin, Catalan club tan season hnih a khel hman. July 2022 khan Barca chhuahsanin, Celta Vigo hi euro maktaduai thumin a zawm.

Spain tana vawi hnih inlan tawh Mingueza hian Villa recruitment team leh Unai Emery te lung a dum hle nia sawi a ni a, mahse, he thu buatsaih a nih lai hian official taka dawrna erawh a la awm lo.

Mingueza hi tlarhnungah chuan khawi laiah pawh chhawr theih niin, hei hi Villa-in an duh chhan a ni a, nipui lai pawh khan Spanish defender ang thoa chhawr kual theih Feyenoord defender Lutsharel Geertruida an lo dawr tawh a, mahse, RB Leipzig a zawm thung.

Villa hian tlarhma lam pawh thuamchak tumin hma an la a, mahse, Borussia Dortmund forward Donyell Malen lakluh an tumna chu German club hian an hnar.

English club hian €18mtd-in Malen hi an ngam a, Dortmund hian hei aia toa hralh an duh thung. Malen hian tun season inelna hrang hrangah match 20 khel tawhin goal nga a khung a, assist vawi khat a nei.