Chelsea-in Chalobah koh kir an rilruk

Tun hnaia beisei ang result nei lo Chelsea chuan an centre back, Crystal Palace-a loan-a khel mek Trevoh Chalobah chu kohkir an rilruk niin khawthlang media-ten an tarlang a, Palace tan thu hriat nuam a ni lo ang.

Chelsea hi an centre-back pahnih Wesley Fofana leh Benoit Badiashile te hliam vangin an chawl mek a, centre back dang Axel Disasi leh Tosin Adarabioyo nei tho mah se, coach Enzo Maresca-a'n Disasi hi centre back-ah bul a la ṭantir miah lo!

Blues match hnuhnung bera Crystal Palace nen 1-1 a an inhnehtawk pawh khan, player pahnih hi awm reng mah se, kum 18 mi Josh Acheampong chu EPL-ah a vawi khat nan bul a ṭantir a, amah ang thoa Blues academy graduate Levi Colwill nen a inkawptir a ni.

Hetihlai hian Blues hian Chalobah an kokir tak tak a nih chuan Palace tan chânna nasa tak a tling ang. Chalobah hian tun season inelna hrang hrangah Palace tan match 14 khel tawhin, goal thum a khung.

Palace manager Oliver Glasner-a'n tlarhnungah player pathum tlar ṭhinin, Chalobah hi Marc Guehi leh Maxence Lacroix te nen a inkawptir ṭhin a, player pawimawh a ni.

Blues hian tun hnaiah Aaron Anselmino chu Boca Juniors aṭangin an kokir bawk. Kum 19 mi centre back hian nipui transfer-ah khan Blues hi Boca aṭang hian a zawm a, loan-in Argentine club-ah hian kir leh nghal mah se, Chelsea hian an kokir leh ta zawk.