Chinese club lar Guangzhou a tawp dawn!

A la rei lo - hmanni lawk kha ni maiin a lang. Chinese Super League (CSL) in football khawvel el an tum a, rin phak baka tam sum an rawn thehchhuah hluai kha!

Player uai thla tawh lam mai ni loin, vanglai hun hmang mek player engemaw zat an thlem lut a, sum an ngah em avangin khatihlaia Chelsea manager Antonio Conte chuan, "Khawvel pumpui club dinhmun tiderthawng khawpin sum an hmang a ni," a ti hial.

A tawi zawnga hrilhfiahna awlsam ber chu, tunlaia Saudi Pro League chet dan leh khatihlaia CSL chet dan kha a inang hle - China-in football khawvel awp an tum a, sum an ui lo a, theihtawp an chhuah.

Mahse, khatihlaia sum seng na ber pawl leh club langsar Guangzhou Evergrande chu Chinese Football Association chuan professional club an nih ve an phal tawh lo a, leiba an ngah em avangin Chinese football-a inhnamhnawih zui chi zelah an ngai lo.

Hmanah chuan...

Guangzhou FC hi Chinese club zinga hlawhtling ber pawla chhal ngam an ni. Coach langsar leh player langsar tak tak an lakluh nasat avangin football khawvelah pawh hriat an hlawh hle.

CSL-ah ringawt vawi riat champion tawhin, champion ngun ber an ni a, Asian Champions League-ah vawi hnih ngawt an champion tawh bawk - nomawi dang chawi an nei nual bawk a, an sulhnu a nep lo.

Guangzhou vanglai bera chhal ngam chu 2013-15 inkar kha a ni. Kum thum chhungin Champions League nomawi an chawi a, FIFA Club World Cup-ah semifinal vawi hnih an khel a, league-ah he kum thum chhung hian an champion vek bawk!

Real Madrid nen academy-a thawk dun turin an inrem hial a, mipui nuai khat chuang lenna tur stadium an ruahman hman bawk - China leh Asia mai an duhtawk lo a, football khawvela hming langsar nih an tum.

A bul ṭanna

Guangzhou hausak bul ṭanna hi kum 2010 a ni a, property developer lar China Evergrande chuan an club hi leiin, an company hming Evergrande an belh a, Guangzhou Evergrande tih an ni.

Khatihlai khan China president Xi Jinping chuan China hi football ram ropuia din a tum a, hei mai ni lo, World Cup hial thlen a, nomawi hial chawi thei tura China siam a duh.

An ram President berin a tuipui miau avangin Chinese sumdawng lianten football an luhchilh a, sorkar lakah thang ṭhat hlawh tumin an sum an ren lo hle.

Evergrande-in Guangzhou an lei tirh aṭangin khelmual chhung leh pawnah sum an seng na a, tun hmain player langsar lo kawl nual tawh sa mah se, Evergrande-in an lei chiah hian an thawm a na lehzual.

Kha mah aw

Kum 2012 khan Italy tana World Cup nomawi chawitu coach Marcello Lippi chuan China panin Guangzhou hi a enkawl a, CSL nomawi pathum a chawi bakah Chinese FA Cup leh AFC Champions League-ah nomawi a chawipui bawk.

Lippi chhuah hnuah, Italian defender ropui Fabio Cannavaro chu coach ni turin an la lut leh a, mahse, defender ni chunga Ballon d'Or dawng thei hian a enkawl hmasakah hian nomawi erawh a chawipui thei lo.

Brazil tana World Cup nomawi chawitu Luiz Felipe Scolari an lakluh phei kha chuan hlawhtling tak an ni. Kum hnih leh a chanve chhungin nomawi pasarih an chawi a, hetah hian AFC Champions League leh CSL a tel.

Scolari chhuah hnuah coach hlui Cannavaro bawk la lut lehin, Italian coach hi a hlawhtling ta nge nge a, CSL-a a champion pui bakah, Chinese FA Super Cup-ah an champion.

Player langsar

Khatihlai khan CSL-in coach langsar chauh an kawl lo a, player langsar tak tak an la lut nual. Guangzhou pawhin foreign player ṭha pangngai mai duh tawk loin, European football el thei tur khawpin player ṭha an seng lut.

Guangzhou tan hian Barcelona midfielder Paulinho, Real Madrid forward hlui Robinho, Cruzeiro-a hming chher tak Ricardo Goulart, Italy international Alessandro Diamanti, Serie A striker 'hot' Alberto Gilardino, Borussia Dortmund striker ṭha Lucas Barrios leh Serbia international Nemanja Gudelj te an tel.

Anni chauh an ni lo. CSL club tam takin player langsar an thlem lut a, Atletico Madrid striker Jackson Martinez, Brazil striker Hulk, Chelsea-a khatihlaia vanglai hun hmangtu Oscar, Manchester City striker hlui Carlos Tevez te chu CSL pan zingah an tel.

Khatihlaia Arsenal boss Arsene Wenger chuan, "China hian European league pumpui an rama sawn tur khawpin sum an nei a ni," a ti hial a, 2019-a Gareth Bale-a'n kar khata pound maktaduai khat hlawh tura Jiangsu Suning a pan teuhzia te kha aw!

Mahse maw...

Beisei ang vek erawhin thil a kal ta bik lo. Chinese Football Association lam an che vat - player langsar lakluhin an ram ngaihven hlawhtir mah se, an ram football tan a ṭha lo zawkah an ngai a, tualchhung footballer-te chu a tuartu an ni thei tih an hria.

Hei vang hian CSL hian player lakluh nana sum uchuak taka sen te, coach-te thlem lut tura sum tam tham tak hman reng chu tihtawp theih a nih an ring a, 'luxury tax' an tih chu an tithar.

He dan thar hnuaiah hian Chinese club-te chuan player langsar tak, man tam tham taka an leiin 'luxury tax' uchuak taka an chawi a ṭul a, hei hian man to taka ram pawn player an lei ṭhin chu a titawp ta deuh.

Hei chauh a ni lo - player hlawh atana insen theih zat an bituk a, sumdawngte chu an company hming club hming atana hman an khap bawk. Hei vang hian Guangzhou Evergrande pawh Guangzhou FC tia thlak a ni.

A tawp ta

Hetihlai hian Evergrande hian tlakchhiat lam an pan daih tawh a, kum 2021 a thlen meuh chuan Covid-19 in na taka an sumdawnna nghawngin, an leiba an pe mumal thei lo.

Kum 2022 khan Evergrande chuan an sumdawnna a tlachhia tih an pawm a, hei hian na takin an club enkawl lai Guangzhou a nghawng nghal - stadium lian tak sak an tum chu an ṭhulh a, player ṭha an hralh nual bawk.

Guangzhou hi hemi kum hian an relegate nghal a, hemi season hian CSL club pathum ngawt chu tihtawp an ni hial! Guangzhou erawh an kal ve hram hram a, mahse, sum lama an buaina an chinfel theih loh avangin Chinese FA chuan professional club an nih ve an phal tawh lo.

Chinese club hlawhtling hian thuchhuah siam zuiin, "Kan club min thlawp a, min ṭantute zawng zawng chungah thupha kan chawi. Heng avang hian kan hnual lo a, Chinese, Guangdong leh Guangzhou football hlawhtlin nan theihtawp kan chhuah zel dawn a ni," an ti - lung an tileng mang e!