MPL12 khelh duh tan dil theih

Mizoram Football Association chuan Mizoram Premier League Season 12 khel tur club pahnih a hrem avangin an hmun ruak a khel duh tan dilna hun a hawng. District FA hnuaia in affiliate club-ten January 31, 2025 thleng dilna an thehlut thei ang.

MPL11 zawhah MFA chuan thuchhuah siamin football hmel tibaltu club, official leh player-te hremna a tichhuak a, hrem zingah hian Sihphir Venghlun leh Ramhlun Athletic te an tel avangin MPL an khel zui thei dawn lo.

MPL12-ah hian Aizawl FC, Chanmari FC, Mizoram Police leh SYS FC te an la awm dawn a, qualifier champion Lawngtlai club MLS FC leh playoff-a Chawnpui FC hnehtu Kanan FC te an tel bawk dawn.

Team paruk khel tur a chiang tawh a, hmun ruak dang pahnih hi District FA hnuaia in affiliate club-ten an dil thei a, diltu hi pahnih aia an tam chuan MFA Executive Committee-in MPL12 khel tur a thlang dawn a ni.