National Games-ah Mizoram fixtures a ṭha

38th National Games 2025 football fixtures an ti chhuak a, Mizoram tan semifinal luhna kawng a inhawng zau. Mizoram hi group A-ah Goa, Uttarakhand leh Assam te an awm. Group B-ah Services, Kerala, Manipur leh Delhi te an awm thung.

Mizoram team-in coach B. Malsawmzuala hoin training an ṭan tawh. Football inelna bik hi Haldwani, Uttarakhand-ah February 4, 2025 aṭanga neih tura ruahman a ni a, team khatah hian player 22 bakah official panga ziahluh theih a ni.

Group A chu

Inelna hmachhawn tur team pariat zingah 2023-24 season Santosh Trophy finalist Services leh Goa te chu seeded an ni a, Mizoram hi team nem zawk Goa nen an awm ho. Goa hi finalist an nih avangin kumin Santosh Trophy final round-ah an tel a, knockout stage an thleng pha lo.

Group A-a awm dang pahnih Uttarakhand leh Assam te hian Mizoram ang thoin kumin Santosh Trophy-ah final round an lut pha bik lo. Inelna thlengtu Uttarkhand hi 2023-24 season Santosh Trophy qualifying round-ah Mizoramin 1-0 in an hneh.

Santosh Trophy-a an sulhnu thlir pawhin Mizoram hi semifinal lut tura rinkai an ni pha. Goa-in vawi 14 final lut tawhin vawi nga an champion tawh a, Assam leh Uttarakhand te erawh an la champion loh bakah final pawh an la lut lo.

Chutihrualin Assam hian National Games an thlen ṭumin football-ah gold medal an la tawh a, dah hniam ngawt an thiang chuang lo. Uttarakhand pawh hi inelna thlengtu an ni a, an tawh a khirh viau thei bawk.

Group B lam hi

Group B-ah Services, Kerala leh Manipur te an awm avangin semifinal luh a harsa dawn a, team nem ber tura ngaih Delhi-in kum zawnin quarterfinal an lut.

Services hi National Games champion lai an ni a, Santosh Trophy-ah nomawi humhim lo mah se semifinal an thleng pha lo. An hneh loh pawh champion zui ta West Bengal an ni.

Kerala hian Services aiin sulhnu an la nei ṭha zawk. Team pahnih hi Santosh Trophy-ah vawi sarih ve ve an champion tawh a, mah se Kerala hian vawi 16 final lut tawhin Services-in vawi 12 final an lut tawh thung.

National Games-ah pawh Kerala hian vawi hnih gold an la tawh a, Santosh Trophy hnuhnung berah finalist an nih bawk avangin tun ṭum inelnaah hian champion rinkai an ni hial ang.

Manipur hi NorthEast aṭanga Santosh Trophy-a champion thei hmasa ber an ni a, ṭum hnih final an lut tawh. National Games-ah erawh inelna hnuhnung berah final an lut a, Services an hneh loh avangin mipa football-ah gold an la lo thung.