Zanin dar 7:00-ah Aizawl FC Vs Sreenidi

I League-ah Aizawl FC-in zanin dar 7:00 hian RG Stadium-ah Sreenidi Deccan an mikhual dawn a, Mizo hlanga khel Victor Lalbiakmawia hote tan point hlawhchhuah ngei a pawimawh hle.

Inkhel hi TV lamah Sony Sports Ten 2-ah a en theih ang a, online-a en duh tan SSEN App-ah a thlawnin a en theih bawk. Chutihrualin football ngainatute tan chuan a hmun ngeia ṭawiawm a pawimawh a, RG Stadium-a inkhel en man hi Rs 100 chauh a ni.

AFC dinhmun

MPL champion Aizawl FC hian kum 2024 an khar ṭha tawk lo a, point ruk hmuh theihna turah point khat chiah an hlawh chhuak. December 14-a Rajasthan nen an inhmachhawn ṭumin 1-0 in hun rei zawk hma hruai mah se minute 87 hnuah goal hnih an chhuah a, 2-1 in an an chak lo.

Nikuma an match hnuhnung berah Real Kashmir an mikhual a, Lalrinzuala goal hmangin 1-0 in hma an hruai. Point thum hmu chhuak turin an dinhmun ṭha hman mah se minute 90-naah goal an chhuah a, 1-1 in inkhel a tawp.

Mizo club hian foreign player an lak miau loh avangin champion beisei ngam a harsa a, table laihawla awm theih pawh result ṭha a ni. Chutihrualin Mizo hlanga khel AFC tan relegate hi thil theih a ni a, relegate lo tura an ṭan mar a ṭul. Mizo club hian match ruk an khelh aṭangin point ruk an hmu a, table-ah 10-naah an awm mek.

Inhliam leh player thar

Aizawl FC hliam vangin captain Lalchhawnkima an chhawr thei dawn lo a, hrem vangin vice captain Lalruatthara a inlan thei dawn lo. Defender tawnhriat nei ṭha pahnih an awm loh avangin Lalhrezuala Sailung tan kawppui tur thar an awm a ṭul a, thlasik bazara loan hmanga an lakluh Laldanmawia nen an inkawp a rinawm.

Mizo club hian tun season-ah squad tihchak nan tawnhriat nei ṭha Samuel Lalmuanpuia an la lut a, Zemabawk North midfielder hi hliam vangin I League-ah a la inlan lo. Samuel bakah rawlthar duhawm Fela Hlawndo an ziaklut thar a, midfield-ah duh thlan tur an ngah sawt ang.

AFC coach Victor Lalbiakmawia chuan, "Sreenidi hian kan point hmuh ang zat tho hmuin kan hnuaiah awm mah se team ṭha an ni a, player pawh an nei ṭha. Hei vang hian point thum hlawhchhuah tumin min rawn hmachhawn dawn. Chutihrualin kan muala khel tur kan ni a, Mizo mipui puihna nen result ṭha hlawhchhuah ngei kan tum," tiin Vanglaini a hrilh.

Sreenidi hian foreign player ṭha bakah Mizo player pali Brandon VL Remdika, Lalromawia, B. Lalnuntluanga leh Lalchhungnunga Chhangte te an kawl a, Aizawl FC lakah football hmuhnawm an chhawp chhuak thei ang.