Man United-a Rashford hmalam hun a chiang lo

Manchester United academy chhuak zinga hmabak nei êng ber zinga mi Marcus Rashford meuh pawh Old Trafford-ah dinhmun a chiang lo a, English striker hi AC Milan nen an indawr.

Kum 27 mi Rashford hi manager thar Ruben Amorim hnuaiah rinrawl a ni lo a, squad-ah a awm meuh lo. English forward hi January thlaa loan hmanga chhuak tura sawi a ni a, Milan bakah hian Borussia Dortmund leh Juventus te hming sawi rik a ni bawk.

Manchester tlangval

Rashford hi Manchester United academy chhuak a ni ringawt lo a, Manchester-a piang leh sei lian a ni a, hei vang hian club tan pawh a hlu bik hle.

Kum sarih mi lek a nihin Man United academy hi a zawm tawh a, a rualpui zingah pawh theihna nei sang bik a ni. November 21, 2015 khan hetih hunlaia United manager Louis van Gaal chuan squad-ah a dah tawh a, kum 18 mi chauh a la ni.

Man United-in player inhliam an ngah avangin khelhna hun ṭha a inher chhuak a; February 25, 2016-a Danish club Midtjylland nen Europa League last 32 second leg an inkhelh ṭumin a inlan a, goal hnih a khung.

Ni thum hnuah Rashford-a'n Premier League-ah khelhna hun remchang a nei lehnghal a, Arsenal 3-2 a an hneh ṭumin goal hnih a khung bakah assist a nei bawk. March 20-ah Manchester Derby-ah goal awmchhun a khung zui bawk.

Rashford hi kum naupang takin club tan rinrawl a ni chho a, season tinin league match 30 chuang a khel thei zel a, England-ah pawh rinrawl a ni pha.

Mahse...

Rashford hian thawm nei ring viau mah se hmasawn zel aiin tlak hniam lam a pan tih theih tur a ni. England tan vawi 60 zet inlan tawhin goal 17 khung tawh mah se Euro 2024-ah telh a ni lo a, club tana khelh ṭhat loh avangin tun thlengin koh a ni tawh lo.

Chutihrualin Amorim awm hma zawngin club tan rinrawl a ni tho a, tun season Premier League-ah pawh match 15 a khel hman. Portuguese manager hnuaiah pawh bul a ṭan chhe lo a, Everton 4-0 a an hneh ṭumin goal hnih a khung.

Mahse, Amorim hian Rashford hi Pathianni zana Toffees an hmachawn hma darkar 48 pawh tling loah Zirtawpni zanah a fawr tih a hria a, Portuguese manager hian inkhelh dawn hnaia zu inna hmuna (bar) a player-te awm hi a remti lo.

Everton an hneh aṭanga ni li hnuah Arsenal an hmachhawn a, Rashford hi bench-ah awmin 2-0 in an chak lo. Amorim hian player siksawi vanga Rashford hi bench-a dah ni bawk mah se zana a chhuah vanga hrem tawk anga ngaitu an awm bawk.

Hemi hnu hian Europa League-a Viktoria Plzen an hneh ṭumin Rashford hian bul a ṭan a, Premier League-ah erawh a zawnin match li ngawt squad-ah a awm pha lo. December 31-a Newcastle laka 2-0 ngawta an chak loh ṭumin squad-ah a rawn awm leh a, mah se kumina an match hmasa bera Liverpool an hneh ṭumin damlohna avangin squad-ah dah a ni leh tawh lo.

Chhuah a ṭul!

Manager leh player inhmuh thiam loh ṭum hi a thleng fo a, siam ṭhat erawh a harsa tawh ṭhin. Manchester United-ah ngei pawh Erik ten Hag leh Cristiano Ronaldo bakah Dutch manager leh Jadon Sancho inkar boruak a ṭha lo a, manager an thlak a nih si loh chuan player tan chhuah mai chu thil ṭha ber a ni a, club tan a ṭha zawk thei bawk.

Arsenal manager Mikel Arteta pawhin London club a enkawl tirha a striker neih ṭhat bera chhal ngam Pierre-Emerick Aubameyang a chhuahtir a, Pep Guardiola pawhin wing back ṭha Joao Cancelo pawhin a chhuahtir bawk.

Chutihrualin Rashford hian kar khatah £325,000 ($413,000) a hlawh a, hetiang zat hlawhtir ngam club an awm loh avangin England forward hi awlsam taka chhuahtir theih a ni lo. Hei vang hian loan hmanga Rashford chhuahtir hi Man United tana awlsam ber a ni a, mah se a hlawh a ṭhen a zar an tum erawh a ṭul thung ang.

Hei le, Milan

Italian club AC Milan an rawn lang nghal chat a, Sérgio Conceição hote hi Serie A-ah pariatnaah an awm mek. Tun Thawhlehni khan Rashford-a unaupa Dwaine Maynard leh a agent te chu Milan-ah zinin Italian club recruitment staff-te nen an indawr.

Chutihrualin Milan hi Rashford-a tana ṭha ber a ni kher lo ang. Italian club hian mual vei lam aṭanga nawr turin Rafa Leao an nei a, Supercoppa Italiana-a Inter Milan laka hnehna an chan ṭumin Rafa Leao a khel ṭha. Bench aṭanga lut Tammy Abraham-a'n chakna goal a khung a, Rashford tan khelhna hmun chan a harsa dawn.

Rashford nena sawizawm club dang Borussia Dortmund leh Juventus-ah erawh harsa loin hmun pawimawh a chan phak a beiseiawm. English forward hi Serie A hmahruaitu Napoli nen pawh an sawizawm a, mah se Naples club zawm tur chuan loan hmanga Galatasaray-a khel mek Victor Osimhen-a'n Old Trafford a pan duh a ngai thung ang.