Spurs-ah Son a cham zel dawn

Tottenham Hotspur chuan an forward Son Heung-min-a contract, kum khat pawhsei theihna dan awm chu an tinung a, kum 2026 thleng Spurs-a khel turin Son-a contract an pawtsei.

London club hian South Korean forward hi chelh chhunzawm an tum a, hei aia rei zawk contract thar pawh an la zawrh leh dawn niin khawthlang media-te chuan an tarlang.

Kum 32 mi Son hian kum 2015 khan Bayer Leverkusen aṭangin Spurs hi a zawm a, English club tan inelna hrang hrangah match 431 khelhsakin, goal 169 a khungsak a, assist vawi 90 a nei tel bawk.

Tottenham boss Ange Postecoglou chuan, "Player ṭha tak a ni a, career duhawm tak he club-ah hian a lo hmang tawh a, tun hnai kum engemaw chen chu kan club leh Premier League tana danglamna thlentu a ni.

"Kan hnena a cham zel tur hi ka lawm a, Spurs tana nomawi chawi ngeia he club-a a hun a thlah liam hi kan duh a ni," a ti - Son hian kum 2019 khan Champions League final a khel a, Spurs tan nomawi a la chawi lo.

Nizan khan League Cup semifinal first leg-ah Liverpool an mikhual a, result kan hre hman lo. Tun season Premier League-ah beisei an phak lo a, table-ah 12-na an ni mek.

Son hian season dang a phak lo a, heti chung hian tun season inelna hrang hrangah match 23 khelin goal sarih a khung tawh a, assist vawi ruk a nei bawk.