Hmeichhe badminton inelna nei

Mizoram Badminton Association hriatpui inelna, Girl's and Women's Badminton Tournament chu nimin khan Ramhlun Indoor Stadium-ah hawnna neih a ni.

Inelna hi MBA bakah Aizawl District Hub for Empowerment of Women (DHEW), Women and Child Development leh MBA thawhpui sa TATA Trusts leh NEIDA te ṭangkawpin an buatsaih a ni a, January 24, 2025-a National Girl Child Day lawmna programme pakhat leh Beti Bachao Beti Padhao (BBBP) kum 10 tlin pual a ni tel bawk.

Tournament-ah hian player 87 ngawtin an hming an theh lut a, category 16-ah inelna neih tur a ni. Inelna hi Aizawl District huam chhunga hmeichhiate tan leh, Mizoram hmun hrang hrang Grassroot Centre-a inzir mek hmeichhiate tana siam a ni a, hmeichhiate chawikanna atana tih a nih mai bakah, hmeichhiaten zau zawka an dikna chanvo, an himna atana dân leh service awmte an lo hriat theih nana tih a ni bawk a ni.