Chennaiyin khelmualah Odisha leng dawn

Indian Super League-ah zanin dar 7:30 hian Chennaiyin chuan Odisha an mikhual dawn. Chennai club hian an league match hnuhnung pasarihah vawi khat chiah chak an nei a, Odisha hi insiamrem nan hman an tum ang.

Odisha hi an che hleithei bik lo. A zawna match hnih an chak hnuah, an match hnuhnung paliah vawi khat chiah an chak a, table-ah pasarihna an ni mek - league match 14 khelh a ni tawh a, playoff khel turin chetsual a pawi thui tawh.

Chennaiyin lam hian tun season-a league match 12 khel tawh defender Laldinliana Renthlei, PC Laldinpuia (13) leh midfielder Lalrinliana Hnamte (14) an kawl a, hmun pawimawh an chan vek avangin zaninah pawh bul ṭan leh vek tura ngaih an ni.

Odisha hian defender Jeremy Zohminghlua (1), Jerry Lalrinzuala (14), midfielder K. Lalṭhathanga (14), Isak Vanlalruatfela (13) leh Jerry Mawihmingthanga (14) te an kawl bawk - Isaka hliam vangin a chawl mek a, Jerry, Puitea leh Jerry Mawia te chu ṭum dang ang thoin bul an ṭan a rinawm.