Sindhu awmna Hyderabad Hunters an chak

Premier Badminton League (PBL) season 5 chu Thawhṭanni zan khan match hmasa ber khelh a ni a, world number 3 PV Sindhu awmna Hyderabad Hunters chuan Chennai Superstarz chu 5-2 in an hneh.

PBL-ah hian mixed doubles, men's singles, men's singles, women's singles leh men's doubles hmang tein inelna neih a ni. Team tin hian an duh ber chu 'Trump Match' atan an thlang thei. He match bika an chak chuan match danga an point hmuh let khat an hmu a, an chak loh erawh chuan point an paih thung a ni.

Hyderabad Hunters tan Sindhu-i'n singles match a khel a, a coach Pullela Gopichand fanu Gayatri Gopichand a hmachhawn. Olympic silver medalist hian 15-5, 15-5 in hnehna a chang - a vawi khat nana PBL kheltu Gayatri tan zir tur tam tak a hnutchhiahsak ngei ang.

Chennai Superstarz tan hian rawlthar beiseiawm Lakshya Sen a inlan a, ani hian an naupan laia badminton an zir laia room pakhata a awmpui ṭhin Priyanshu Rajawat (Hyderabad Hunters) chu 15-6, 13-15, 15-14 in a hneh.

Nizan khan North Eastern Warriors leh Bengaluru Raptors an inhmachhawn a, zanin hian Chennai Superstarz leh Mumbai Rockets te an inkhel leh bawk ang.