I Day Football 2016 12:00 PM-ah Ramhlun N Vs BVT I Day Football semifinal thlen ngei kan tum - Tawia
Ramhlun North coach Lal-ruat-liana Sailo (Tawia) chuan, I Day Football ṭantirh lamah team ṭha din chu a hna hmasa ber a nih thu sawi mah se semi-final kawng a inhawn takah chuan bawhpelh an tum loh thu a sawi.
Inrinni inkhelah Shillong Lajong-in Zo United an hneh avangin Ramhlun North tan semifinal lut turin vawiin chhun dar 12:00-a tla chiang tawh Bethlehem Vengthlang FC hneh a tawk.
Nikum I Day Football finalist BVT hi an chak emaw, team pahnih hi an inhnehtawk emaw a nih chuan Dinthar FC beiseina a nung ve leh chiah ang.
Lalchhuanawma enkawl Dinthar FC hian an match hnuhnung berah la chak vek Shillong Lajong an hmachhawn dawn a, Group B-ah Zo United, Ramhlun North leh Dinthar FC ten semifinal luh theih dan kawng an la nei vek.
Ramhlun North dinhmun hi ṭha thawkhat viau angin lang mah se BVT hian I Day Football hmaa friendly match-ah an hneh. BVT coach Lalbiaksanga Colney chuan, "Chak tumin kan khel dawn. Hneh nei miah loa inelna hman zawh hi mualphona a ni a, chuvangin theihtawp kan chhuah ang. Chutihrualin kan dinhmun a chiang tawh a, semifinal kan luh theih tawh loh avangin hlauhthawn tur a awm lo. Nuam sa takin Ramhlun North hi kan hmachhawn thei ang," tiin chak an tum thu a sawi.
BVT hian Zo United nen an inhnehtawk ṭuma hrem vanga an chhawr theih loh Kolasib midfielder Lalrintluanga (Tuka) an hmang thei tawh dawn a, Ramhlun North tan chak a awlsam dawn lo.
MPL kaithar hian an match hnuhnung berah Dinthar FC an hneh a, ṭantu an neih
ṭhat bawk avangin Shillong Lajong hnung zui thei zingah an dinhmun a ṭha ber.
Ramhlun North coach Tawia chuan, "Semifinal luh chu kan tum tur a lawm. Match tinah inzirna tur kan nei zel a, tun hi inzirna hun ṭha tak chu a ni. Chak tumin kan khel ang," tiin a sawi.
Team pahnihin chak an tum ve ve avangin inkhel hi a hmuhnawm dawn a, Dinthar FC ṭantute hi vawiinah chuan BVT ṭantute an ni ang!
Referee chungchang sawiin Tawia chuan, "Hma-sawn turin referee-ten theihtawp an chhuah a, chutih-rualin tun aia an ṭan la ngai a ni. Dinthar nena kan inkhelh khan kan dinhmun ṭhat tawh hnuah penalty min pe lo a, football kalphungah chuan box chhunga foul chu penalty pek mai tur a ni. An thutlukna hian inkhel a tihdanglam theih avangin tualchhung football hmasawn zel nan referee ten ṭan an lak a ṭul hle a ni," tiin Vanglaini palai a hrilh.
GROUP B - RESULT, FIXTURES & STANDING
NIMIN INKHEL RESULT
Zo United FC 1 - 2 Shillong Lajong FC
ZUFC : Malsawmdawngliana 71'
SLFC : Samuel Lalmuanpuia 74', 86'
VAWIIN INKHEL TUR
12:00 PM Ramhlun North FC Vs Bethlehem VT FC
August 9, Thawhlehni
12:00 PM Shillong Lajong FC Vs Dinthar FC
# Team Pld W D L GF GA GD Pts
1 Shillong Lajong 3 3 0 0 8 3 5 9
2 Zo United FC 4 1 2 1 4 4 0 5
3 Ramhlun North FC 3 1 1 1 3 5 -2 4
4 Dinthar FC 3 1 0 2 2 3 -1 3
5 Bethlehem VT FC 3 0 1 2 3 5 -2 1