Lajong tan Samuel-a bawk

Zo United-in Malsawmdawngliana hmangin goal khung hmasa mah se mikhual team Shillong Lajong chu Samuel Lalmuanpuia goal hnih hmangin 2-1 in an chak.

Inrinni khan Lammualah I Day Football Group B pakhatna leh pahnihna an inkhel a, Thang-boi Singto hoten hnehna an chan avangin point kaw (9) hmuin hma-hruaitu an ni chiang ta. Zo United erawh pahnihna la ni chhunzawm zel mah se Ramhlun North FC leh Dinthar FC te inkhelh hmabak result-ah an innghat.

Lajong-in Ramhlun North lakah goal li tehmeuh khung mah se coach Vanlalrova defensive game ṭha tak paltlang an harsat hle. Inkhelh banah Lajong boss Thangboi Singto chuan, "Match thum kan khelh tawhah chuan Zo United hi an la ṭha ber," tiin a khingpui team a fak.

Zo United hian minute 71-naah Malsawmdawngliana hmangin an khung a, goal luhna turah hian Jesse Laldinpuia Ralte a thawh hlawk hle. Amaherawhchu coach Rova hote hi goal an khung hnuah an talbuai a, Lajong midfielder Jacob Lalrawngbawla freekick pet ṭha tak chu Zo United keeper MC Lalneihsanga'n hmun himah a nam per zo lo a, minute 74-naah Samuel-a'n an si phurh a sut.

An inhnehtawk hnuah Zo United-in duh an thlang sual - draw mai duhtawk loin team ṭha lo zawk ni chunga chak kher an tum avangin Samuel-a'n Zo United defender pathum bumin minute 86-naah chakna goal a khung.

Zemabawk North tlangval hian I League-ah Aizawl FC lakah a thiamzia a pholang tawh a, I Day Football-ah a talent neih ṭhatzia kan hmu leh ta bawk.

Zo United hi Lajong boss-in fak mah se point an hmuh zawh miau loh avangin Ramhlun North emaw Dinthar FC emawin an match hnuhnung bera point thum an hmuh chuan an tla - midang inkhel result-ah an innghat ta.