Foxes tan Schmeichel a rinawm

Leicester City goalkeeper Kas-per Schmeichel chuan Premier League champion tan season nga chhung khel chhunzawm turin contract thar a ziak. Kum 29-a upa keeper hi season hmasa league match 38-ah inlan kim vekin vawi 15 goal a chhuah lo a, Foxes champion-na kawnga an player pawimawh te zinga mi a ni.

Kum 2011-a Leeds United aṭanga Leicester pantu keeper chuan, "He hmun ka rawn pantirh aṭang khan a nuam nghal em em a, hmasawn zawngin nasa takin ke kan pen a ni," a ti.

Denmark international chuan sawi chhunzawmin, "Premier League nomawi chawi hlim kan ni a, a pawimawh ber chu season hmasa anga kan tuihalna kha kan nei reng tur a ni. He hmun hi ka awmna tur tih pawm thlap chungin thutlukna ka siam a ni," tiin vawi 200 aia tam a inlan tawhna club-ah a lungawi thu a sawi.