Hammers-ah Ayew a lut dawn

West Ham chuan Swansea City aṭanga Andre Ayew lalut turin Welsh club chhiarna zat pound maktaduai 20 pek an remti a, Ghana forward leh Hammers hian mimal thilah indawrna nei mekin he thuziak i chhiar meuh chuan an inrem tawh hial mai thei.

Kum 26-a upa forward hian season hmasa khan Marseille
aṭangin Swansea hi a zawm ve chauh a, season hman zawh takah khan goal 12 khungin Welsh club tan hian top scorer a ni.

Swansea hian Ayew hma hian forward pathum Alberto Paloschi, Eder leh Bafetimbi Gomis te an chhuahtir tawh a, hetihrual hian player thar an lalut ve reng bawk. Spain international Fernando Llorente chu free transfer-in kum hnih chhung atan an lalut tawh a, an club chanchina player manto ber ni turin Atletico Madrid striker Borja Baston an dawr mek bawk.

Kum 23-a upa Baston hian season hmasa kha La Liga club Eibar-ah loan-a hmangin league-ah goal 18 a khung a, a man zat tur hi pound maktaduai 15 bawr vel ni tura ngaih niin he thuziak i chhiar meuh chuan Swans player a ni tawh hial mai thei.