Rio Olympic 2016 hawnna a ropui

Maracana Stadium-ah Rio Olympic 2016 chu mawi leh ropui takin a khuhhawnna neih a ni ta. Brazil stadium hmingthanga ṭhutna 78,838 chu luah khah vek niin khawvel hmun hrang hrang aṭangin mipui tluklehdingawm thum velin an thlira ngaih a ni - Inrinni zing khan khawvelin Rio lam a hawi a, August 21 thleng a thlir zui ang.

Brazil president lailawk Michel Temer chuan 31st Olympic Games hawnna a nei a, International Olympic Committee president Thomas Bach leh United Nations secretary general Ban-Ki Moon te hmel kan hmu zui bawk.

Tennis world number 1 hlui Gustavo Kuerten chuan stadium chhungah meichher rawn tlan luh puiin 1996 Olympic hmeichhe basketball silver medalist Hortencia Marcari a hlan chhawng. Ani hian Brazilian 2004 Athens Olympics marathon bronze medal dawngtu Vanderlei de Lima hnenah hlanchhawng lehin Lima hian Olympic meipui chheh (cauldron) chu a dep kai. Pele chu meipui dep kai tura tih ni mah se Brazilian football legend hi a hriselna dinhmun a ṭhat loh vangin he dinhmun hi a luah thei lo.

Hlaphuah thiam leh zai-thiam ni bawk Paulinho da Viola-a'n acoustic guitar nen Brazilian National Anthem a sak chu a ngaihnawmin mipuiin an hlut hle. 'The Girl from Ipanema' an play laia dawhsana Brazilian supermodel Gisele Bundchen che vel chuan mipui mit a ti tlaiin sawi zui a hlawh leh pek - kum 12 chauha upa Brazilian rapper MC Soffia pawhin khawvel hmuhah talent a neih ṭhat bik zia a pholang.

IOC president Bach chuan, "Brazilian-te tan zan duhawm a ni a, mumang rama inlo man
ṭhin leh inlo suangtuah ṭhin kha hun rei lote chhungin a takah in chantir thei a ni. Rio de Janiero hi khawvel khawpui mawi berte zinga miah in chhuah tawh a, hun harsa tak paltlanga in hnathawh hi a ropui. In chungah hian rinna kan nghat ngam a ni," a ti.

Rio 2016 president Carlos Nuzman chuan, "Mihring dam laia vannei ber ka ni. Kan khawpui leh kan ram hi ka chhuang a, he infiamma kutpui theng tura kan hnathawh hi a ropui," tiin an ram chanchina Olympic an thlen vawi khatna ropui a tih thu a sawi.

Olympic thuchah sawi chhun--zawmin Nuzman chuan, "Tunah chuan a tihchhiat aiin a siam
ṭhat hna thawh a hun tawh. Kan chhenna hi i dinthar leh ang u," tiin khawvel sik leh sa danglam chho zel siamṭha turin mipui a sawm.

Ram 206...?

Rio Olympic-ah hian ram hrang hrang 205 aṭangin infiammi 11,000 vel zet an kal khawm a, an zinga 10-te chu ral tlan (refugee) an ni. Khuhhawna hunah hian ram hrang hrangte hi Maracana stadium-ah hian a indawtin an rawn lut a, Olympic thleng hmasa bertu Greece rawn lang hmasa berin ram dangin an rawn zui zel a, a tawp berah a thlengtu Brazil an rawn kal.

India tan Punjab tlangval Abhinav Bindra chuan flag rawn kengin hma a rawn hruai. Kumin hian Indian Olympic Association chuan infiammi 124 te chu infiamna kawng hrang 15-a inlan turin a tir - kum dang zawng aia an inlan tam ṭum niin beiseina an nei sang hle.

India tan hian a vawi sarih nan tennis star Leander Paes chu Olympic-ah a hmel kan hmu leh a ni. Opening ceremony kawngzawhah hian mipa hockey bakah archery, table tennis leh weightlifting team te chuan inelna an hmachhawn hnaih avangin an tel ve lo.

Ram pakhatin flag keng-tu (flag bearer) an nei zel. Wim-bledon vawi hnih champion tawh Andy Murray chuan Great Britain flag kengtu a ni dawn tih a hriat khan, "Infiamnaah chuan a ropui ber" tiin a lo sawi tawh. Olympic-a tel phak pawh a harsa a, chung zinga flag bearer ni tur chuan ram khata infiammi langsar ber pawl nih a ngaih ṭhin.

Olympic chanchina mimal gold medal la hnem ber Michael Phelps chu United States flag kengtuah a rawn ṭang a, gold medal 18 zet la tawhtu hi mipuiin an lawmin stadium a lo luh laiin thawm a ring zual bik hle. Grand Slam vawi 14 champion tawh Rafael Nadal (Spain) leh Caroline Wozniacki (Denmark) te pawh an ram flah kengtu an ni.

#TeamRefugee

Kumin hian Olympic chan-chia a vawi khat nan Refugee athlete (Ral tlan) an awm! Europe-ah ram buai a tam a, tualchhung leh politics buaina a tam avangin raltlan an tam. March 2, 2016 khan International Olympic Committee (IOC) chuan raltlante tan hian Olym-pic-a an inlan ve theihna tur kawng a hawn sak.

Syria, South Sudan, Ethio-pia leh Democratic Republic of the Congo (DRC) aṭangin athlete 10 thlan chhuah an nia, heng mite hian Olympic Flag hnuaiah 'Independent Olym-pians' niin Rio-ah an inlan. South Sudanese runner Rose Nathike Lokonyen-'n Olympic flag kengin hma a rawn hruai a, refugee athlete 10 ten stadium an luh lai hian mipuite chuan ding chungin an lo lawm hial.

IOC president Bach chuan, "Anni hian khawvela raltlan maktaduai tam takte tan beiseina an siam sak ang," tiin Olympic chanchina refugee team hmasa berte chuan midang tan beiseina nung an siamsak ngei a beisei thu a sawi.

Bach chuan sawi chhun-zawmin, "Tharum thawhna leh harsatna vangin in chenna hmun nghet in chhuhsan a ngai a ni mai thei. He Olympic-ah hi chuan kan inpumkhatna ti zualtu in ni. Khawvelah hian mi tam tak infiamna hmanga inpumkhatna thlentu an awm a ni," a ti.

US president Barack Obama pawhin, "A vawi khat nan #TeamRefugees chu khawvel hma-ah an rawn ding chhuak. Hei hian khawi hmun aṭang pawhin hlawhtlinna chan theih a nih zia a ti lang chiang hle," tiin a sawi ve bawk.

Kum 18-a upa Yusra Mardini chuan, "Mihring pangngai tho kan ni. Raltlan chauh kan ni bik lo a, khawvela mihring dangte ang tho kha kan la ni," a ti. Mardini hi Syria tleirawl niin tuihleuh thiam a ni a, nikum khan an rama lawng pakhat chesual a chuang raltlan tam tak a lo chhanhim tawh.

South America-a Olympic an vawi khat nghahna hi hrileng mek Zika, venhimna lam ṭha tawk lo, sum leh pai indaih lohna, hmunhma zawh fel hman loh leh sawiselna hrang hrang awm mah se Rio Olympic hawn a nih meuh chuan a kal ve lote tan-a uiawm leh kal tum si ṭhulh-tate tana inchhir ram ramna tham khawpin khawvelin a hlut!

Gold hmasa ber

Nizan khan American shooter Ginny Thrasher chuan 10m air rifle-ah pakhatna dinhmun a luah. Virginia tleirawl hi Rio Olympic 2016-a gold medal dawng thei hmasa ber a ni.

Kum 19-a upa Thrasher hian final round-ah point 208.0 a hmu a, 2004 Athens Olympic leh 2006 world champion ni bawk Du Li chuan point 207.0 hmuin China tana silver medal hmasa ber a la bawk. China nula Yi Siling chuan point 185.4 hmuin bronze a dawng bawk.

Mirza leh Thombare chak lo

Hmeichhe double-a India aiawh Sania Mirza leh a
ṭanpui Prarthana Thombare te chu an match hmasa berah Chinese pair Shuai Zhang leh Shuai Peng te ṭangdun lakah darkar hnih leh minute 44 chhungin 7-6 (8-6), 5-7, 7-5 in an chak lo.

Mipa double lamah pawh Leander Paes leh Rohan Bopanna te chu Polish pair M Matkowski leh L Kubot te ṭangdun lakah 4-6, 6-7 in an chak lo bawk.

India hian tennis-ah medal dawn beiseina pakhat an la nei a, hmeichhe double world number 1 Miraza leh Rohan Bopanna te chu mixed deuble-ah an ṭangdun dawn a ni.

Tennis match hmasa-ah India an chak lo ve ve a, Table Tennis lamah pawh beisei an phak lo. Mipa single player Sharath Kamal Achanta leh Soumyajit Ghosh te bakah hmeichhe single kheltu Manika Batra leh Mouma Das te chu an match hmasa berah an chak lo nghal vek.

Hei le Russia...

International Olympic Commitee (IOC) dan leh hrai hnuaia endikna hautak an paltlang hnuah Russian infiammi 271 ten Rio an pan. An ram infiammite hun tawn harsa tak karah Beslan Mudranov chuan world champion Yeldos Smeto hnehin Judo 60kg category-ah pakhatna a ni a, an ram tan gold medal hmasa ber a hlawh chhuak.

World record

Nimin zing khan Hungary nula tuihleuh chak Hosszu Katinka chuan 400m Individual Medley chu 4 min 26.36s chhunga thlengin gold medal a dawng a, a result hi world record thar a ni bawk.

Australian hmeichhe tuihleuh team Cate Campbell, Bronte Campbell, Emma McKeon leh Brittany Elmslie te chuan 4x100m Freestyle Relay world record thar (3:30.65) siamin 2012 London Olympic Games-a an gold medal dawn chu an humhim.

Vietnam tan Hoang

Olympic-a a vawi khat nan Vietnam chuan gold medal an la ve ta. Nimin khan Vinh Xuan Hoang chuan 10m air pistol-ah point 202.5 hmuin pakhatna a ni. Brazil tlangval Felipe Wu chuan point 202.1 hmuin pahnihna a ni a, a thlengtu ram tana medal dawng hmasa ber a ni.