I Day Football 2016 Aizawl FC nge Chanmari West FC?

I Day Football group match hmuh­nawm ber tura ngaih Aizawl FC leh Chanmari West FC chu vawiin tlai dar 2:45 hian Lammualah en theihin a awm dawn a, Zonet Zawlbuk-ah live-a pekchhuah a ni bawk ang.

Aizawl FC tan semifinal lut turin draw chauh tawk mah se Chanmari West FC an chak a nih chuan cham­pion lai AFC an tla dawn.

HC Zarzoliana hnuaia harhtharna chang mek West Warrior hian an khelh tawh aṭangin team ṭha an nihzia an lantir tawh a, vawi­in chawhnu inkhel hi a hmuhnawm ang.

Lajong pumpelh?

Group A-ah Chanmari FC-in semifinal an lut chiang tawh a, hmahruaitu erawh an la ni lo. Aizawl FC leh West Warrior inkhela chak zawk hi a chung berah an awm dawn a, chutihrualin Lalsangzuala Hmar hote Chanmari hian an match hnuhnung berah AIFF Academy an hneh chuan hmahruaitu an ni tho ang.

Group B-ah Shillong Lajong chak vekin hmahruaitu an ni chiang tawh a, I League club pumpelh nan Group A hmahruaitu nih a ṭul.

Ruatthara tel loin

Aizawl FC-in an match hmasa berah an defender pawimawh Ricky Lallawmawma an chhawr thei lo a, Chanmari FC an hneh lo. AFC hi Mizo defender ṭha rual awm khawmna tia sawi theih ni mah se tlarhnung a la nghing reng a, Chhinga Veng an khelh ṭumin goal hnih an chhuah.

Coach K. Malsawmkima tana har­satna belhchhah turin defender
ṭha Lalruatthara'n hrem vangin West Warrior a hmachhawn ve thei lo.

West Warrior Danmawia

Chanmari West-in coach thar an nei ringawt lo a, player thar an nei tel bawk. H. Lallianzama thlawp tura lakluh R. Laldanmawia leh Laldampuia-te hmangin an goal nawr a nat phah takzet a, Sialhawk tlangval Danmawia hi goal khung tuma a tuihal avangin dan a harsa hle.

Midfield-ah Zo United aṭanga an lakluh K. Lalnunzama (Valtea) leh Dinthar FC aṭanga an lakluh Lalmuansanga te an ṭangkai a, West Warrior squad hi chhah ṭha tak ni lo mah se an dam kim phawt chuan eng team pawh hneh thei an ni.

Chak tum ve ve

Aizawl FC coach K. Malsawmkima chuan, "Draw chauh pawhin semifinal lut thei mah ila chak tumin kan khel dawn. Chanmari West hi an result a-
ṭangin hma an sawn tih a hriat theih a, amaherawhchu kan chak lohna chhan tur ka hre lo," a ti.

I Day Football champion lai tana thu lawmawm chu Albert Zo­hmingmawia a dam leh tawh a, starting eleven-ah a rawn kir nghal ang. AFC hi tun inlenaa foreign player nei awm chhun an ni a, Bright Middleton Mends chuan goal khat khung tawh mah se Ghanaian striker hian a inlan tawh chinah goal khung aiin ṭhiante ball pass a thiam zawk.

Chanmari West coach Zara chuan, "Chak lo thei kan ni tawh lo a, draw-in awmzia a awm tawh lo bawk. Chuvangin Aizawl FC hi hneh tumin kan khel dawn a, attacking football kan lantir ang. MPL club zawng zawng hi an ṭha vek a, AFC hi an ṭha bik tawh chuang lo," tiin team chhe zawkah a inngai lo.

West Warrior tana thu lawmawm chu an player zawng zawng an dam kim a, an ṭhat theih dan berin Aizawl FC an hmachhawn thei dawn.

Inkhel en chakawm a ni a, player an ṭha a, team enkawltu lam an ṭang a, fans pawh an ṭang tawh takzet.