RIO olympic 2016 Neymar leh Brazil-in goal an khung thei lo
World Cup nomawi vawi nga an chawi tawh a, football thiam ram Brazil-in Olympic gold erawh an la nei lo - an ram ngeia Olympic an thlennaah Brazil-in champion ngei tum mah se match hnih an khelh tawhah goal an la khung lo!
Pathianni zan khan Neymar captain-na hnuaia khel Brazil hian Iraq chu goal khung loin an inhnehtawkpui a, an match hmasa berah South Africa chu goal khung loin an lo inhnehtawkpui tawh bawk.
Inkhelh zawha an fan-te ngeiin an auh el Brazil hian Asian team lakah hian vawi 20 zet shot an nei a, heng zinga vawi ruk chiah hi target-a shot an neih theih a ni thung.
Brazil awmna Group A inkhel dangah Denmark chuan minute 69-naa Robert Skov goal khung hmangin South Africa chu 1-0 in an hneh a, group hmahruaitu an ni. Match thum khelh tur awmah team tinin vawi hnih ṭheuh an khel tawh a, pahnihna Brazil tan quarterfinal luh beiseina a la bo lo.
Mexico an thiam
Olympic football champion lai Mexico chu Fiji tan an ṭha lutuk hret a, South Korea laka goal riat chhuahtu team hi 5-1 in an sawp. Fiji hian Roy Krishna hmangin hma hruai ve zet mah se Mexico tan Erick Gutierrez chuan second half-ah goal li a khung a, Fiji tan tih theih a tam lo.
Group C inkhel dangah South Korea leh Germany chu 3-3 in an inhnehtawk. South Korea tan Hee-Chan Hwang-a'n goal hmahruai a khung hnuah Germany-in Serge Gnabry hmangin an siphurh an sut a, Davie Selke hmangin hma an hruai chhunzawm.
Mahse, Asian team tan Heung-Min Son leh Hyun-Jun Suk ten goal hnih dang khung lehin South Korea hi chak tur angin lang hman mah se injury time-ah Arsenal midfielder Serge Gnabry chuan an si phurh a sut leh a, point khat hlu tak an hlawh chhuak.
Group C-ah South Korea-in anmahni ang thoa point li hmu Mexico aia an goal difference ṭhat vangin hma an hruai a, Germany chuan point hnih hmuin pathumna an ni a, Fiji-in a mawngphah an luahlum.
Hmahruaitu Portugal
Group D-ah Portugal-in 100% chak record an neih chhunzawm a, match hmasa bera Argentina an hneh hnuah Honduras chu 2-1 in an hneh leh ta. Honduras hian Alberth Elis hmangin goal hmahruai khung mah se defender Tobias Figueiredo leh Porto striker Goncalo Paciencia ten Portugal tana point thum hlu tak hlawh chhuak turin goal an khung ve leh a ni.
Match hmasa bera an chak loh hnuah Argentina-in Algeria chu an puanthuah an tel tir a, African team hi Atletico Madrid forward Angel Correa leh Deportivo Maldonado striker Jonathan Calleri goal hmangin 2-1 in an hneh a ni. Inkhel boruak sangah hian Argentina captain Victor Cuesta leh Algerian defender Ayoub Abdellaoui te chu hnawhchhuah niin player 10 ve ve nichungin team pahnihin match an khar.
Quarterfinal-ah Nigeria
Nigeria-in quarterfinal lut hmasa ber ni turin group B inkhelah Sweden chu 1-0 in an hneh a, Roma striker Sadiq Umar chuan he inkhela goal awmchhun hi khungin inkhel pahnih aṭangin point ruk an nei ta. Group stage inkhel hmabak pakhat la awmah Nigeria hi anmahni hnaih bertu Colombia aiin point liin an sang fal a, umphak theih an ni tawh lo.
Colombia hi Japan nen 2-2 in an inhnehtawk a, South American team hian Teofilo Gutierrez leh Hiroki Fujiharu hmangin hma hruai mah se Japan hian Arsenal striker thar Takuma Asano leh Shoya Nakajima hmangin an si phurh an sut a ni.