RIO olympic 2016 Ram 31-in medal la tawh

Nimin tlai thleng khan Rio Olympic neih mek-ah ram hrang hrang 31-in medal an la tawh. United States, China leh Aus-tralia te chuan gold medal pathum ṭheuh an la tawh - silver la hnem ber US chu hmahruaitu an ni mek.

Long a chak ber

China pachak Long Qingquan chuan weigh-tlifting 56kg category-ah nimin khan 307kg chawiin wolrd record thar a siam. Long hian clean and jerk-a a chawi hnuhnung berah 170kg a chawi a, a pumpuia a chawi zat belhkhawm hi 307kg a ni. London 2012 champion Om Yun-Chol chu pahnihna a ni thung. North Korea tlangval Yun-Chol hian 303kg a chawi thung. Pathumna chu Thailand aiawhtu Sinphet (289kg) a ni.

Argentina tan Pareto

Paula Pareto chuan Judo U48kg category-ah gold medal a dawng a, Argentina tan Olympic Judo inelnaa gold medal la thei hmasa ber a ni. Kum 30-a upa Pareto hian 2008 Beijing-ah khan bronze medal a lo dawng tawh a, nikum khan world championship-ah pakhat-na a lo ni tawh bawk.

Hei le Kosovo...

Kumin Rio Olymplic-ah hian ram 206 an inlan a, heng zinga ram pahnih Kosovo leh South Sudan te chu an vawikhat telna a ni. Kosovo aiawhtu Majlinda Kelmendi chuan 52kg judo-ah gold medal dawngin an ram infiamna chanchinah bung thar a ziak.

GB tan gold hmasa ber

Adam Peaty chuan mipa 100m breaststroke-ah world record (57.13) siamin pakhatna dinhmun a luah a, hei hi Britain tan Rio Olympic-a an gold medal hmasa ber a ni. Kum 1988 khan Adrian Moorhouse chuan tuihleuhah Britain tan gold medal a lo dawng tawh a, hemi hnuah Peaty hi hetiang dinhmun luah leh thei hmasa ber a ni.