Copa America Argentina chak nan Aguero goal khat a tawk
Argentina chuan Copa America Group B hmaruaitu ni turin Nilaini zing khan Uruguay chu goal khat faiin an hneh. Goal awmchhun hi Manchester City striker Sergio Aguero tauh luh a ni.
An match hmasa berah Argentina hian Paraguay lakah an goal hnih neih sa hmunhim zo lo mah se, an match hnihnaah erawh goal an chhuah tawh lo. Argentina hian South America-a an ṭhenawm ramte vawi 82 an hnehna chiah a ni nghe nghe.
Argentina hian an group match hnuhung ber Jamaica nen an khelh hunah point khat chauh pawh an hmu a nih chuan quarterfinal an lut ang. Jamaica hian match hnih an khelh tawh aṭangin point an la hmu ve lo.
Inkhel chu
Inkhel an ṭan phat aṭangin Angel Di Maria a hlauhawm nghal, midfilder Javier Pastore ball siamsak chu ṭha takin goal-ah a pet nghal. Mahse Uruguay goalkeeper Fernando Muslera-a'n ṭha takin a lo dan sak. Hemi hnu lawk hian Manchester united player hian goal dinglam sirah uiawm takin a pet chhuak bawk.
Attacking player ṭha rual awm khawmna Argentina-in goal khung tumin Uruguay tlar hnung ṭhiat ṭhin mah se Pastore leh Aguero ten Galatasaray goalkeeper an paltlang zo lo.
Uruguay hian first half-ah goal khung theihna hun ṭha nei mah se Nicolas Lodeiro cross ṭha tak mai chu vengtu nei lo Diego Godin-a'n goal ban hrulah a tauh chuak hlauh.
Second half ṭan aṭanga minute 10-na lekah goal kan hmu ta. Paris Saint-Germain attacking midfielder Pastore chuan Pablo Zabaleta tan ball fing tak pein Manchester City defender hian a cross nghal, he ball lo kal hi defender pahnih kar aṭanga rawn put chhuak Aguero chuan chiang zetin a tauh goal.
An group match match hnuhnung bera Paraguay hmachhawn tur Uruguay tan point hmuh tuma beih a hun ta. Right back Maxi Pereira-a goal shot ṭha tak mai chu Argentina goalkeeper Sergio Romero-a'n lo dang mah se a per let chu Diego Rolan-a'n a chang zui. Uruguay striker Rolan hian an si phurh sutna hun ṭha tak nei ve lehin goal chungah a thlawh chhuak luah.
Uruguay tan Alvaro Gonzalez chuan yard 30 aṭangin ṭha takin hlap mah se goal bar sirah a kal liam bawk.
Beisei anga langsar lo Lionel Messi hun tawp dawn lamah a rawn inlar a, ani hian ṭum hnih chu ṭha takin goal-ah pet mah se an goal hnihna tur a pet lut thei tawh bik lo.
An khingpui ten tharum an hmang nasa tih sawiin Argentina captain kum 27-a upa Messi chuan, "A nihna takah chuan Uruguay khan ṭha taka ball in pek kual kha an duh lo ni berin a lang. Tharum hmangin na tak takin min bei zel a ni. Kan duh leh kan tum ber goal kan khung avangin ka lawm a, goal kan chhuah lo kha kan lawmna ti zual tu a ni bawk," tiin a sawi.
Graoup B inkhel pakhat zawkah Paraguay chuan an forward Edgar Benitez goal khat khung hmangin Jamaica 1-0 in an hneh.
Match hnih an khelh aṭanga point khat mah la hmu lo Jamaica tan quarterfinal luh theih a ni tawh lo a, hnehna changtu Paraguay tan erawh quarterfinal lut turin Uruguay lakah point khat hmuh a tawk thung ang.
Naktuk zing dar 5:00 hian Group C Peru leh Venezuela te an inkhel ve leh dawn. Copa America hi Mizoram aṭang chuan True Sport 1 channel-ah en theih a ni ang.