City-in Sterling an ngam huai
English player mamawh Manchester City chuan a vawi hnih nan Liverpool aṭanga Sterling lakchhuah tumin Merseyside club an dawr leh ta.
Arab sumdawng hausa hnuaia sum leh pai lama mawm tak City-in Liverpool an dawrna zat hi pound maktaduai 35.5 nia tarlan a ni a, a behbawm dang nena belhkhawm chuan pound maktaduai 40 lai ni tura ngaih a ni.
Kum 20-a upa English winger hi kar hmasa khan City hian Anfield aṭanga lakchhuah tumin Reds hotu te chu pound maktaduai 25-in an lo dawr tawh a, mahse an hlawhchham.
Reds lamin an rawlthar duhawm manah hian pound maktaduai 50 lai an chhiar avangin City-in an dawr nawnna pound maktaduai 35.5 pawh hi an hnar leh tura ngaih a ni.
Arsenal leh Real Madrid nen pawha sawi zawm ni mek Sterling hian kum 2010 khan QPR aṭangin Liverpool hi a zawm a, Anfield-a cham turin 2017 thleng contract a nei. April thla khan kar khata pound 100,000 hlawh tura Liverpool-in contract thar an zawrh chu a lo hnar tawh a, Reds manager Brendan Rodgers chuan a contract zawh hma chu chhuah tir tumna an neih loh thu a lo sawi tawh thung.
City dilna hi Reds hian an hnawl leh a nih chuan sum lama buai lo Manchester khaw club hian an dawr nawn leh ngeiin a rinawm a, Liverpool-in an chhiarna man zat pound maktaduai 50 a duhtu an hmuh chuan an chelh reng theiin a rinawm loh.