Saints-ah Juanmi

Southampton chuan Malaga aṭangin striker Juanmi an la lut. Spanish forward hian St Marys-a cham turin kum li daih contract a ziak a, a man hi euro maktaduai sarih a ngaih a ni.

Kum 22-a upa Juanmi hian 2008 aṭangin Malaga tan a khel ṭan a, kum 16 leka upa a nihin club tan La Liga-ah goal a khungin Malaga tana goal khung thei naupang ber a ni.

Saints forward thar hian March thla khan Spain leh Netherlands te friendly match an khelh ṭumin ram tana a match hmasa ber a khel a, UEFA European Under-19 Championships-ah erawh Spain U19 ṭum hnih a champion pui tawh.

Nipui transfer-a Saints player ziah luh hmasa ber Juanmi hian 2014-15 season khan La Liga match 34 a khel a, goal riat a khung.

Southampton hian nikum khan Luke Shaw leh Adam Lallana te chan mah se Premier League match 38-ah vawi 18 hnehna an chang a, pasarihna niin season tharah Europa League an khel dawn.