Chelsea-ah Radamel Falcao a lut hnai

Premier League champion Chelsea chuan Monaco striker Radamel Falcao chu season thar atan loan-in an hawh dawn.

Kum 29-a upa Colombian striker hi tunah chuan Chile-ah Copa America khelin a awm mek. Season hmasa khan Falcao hian Manchester United tan khel in match 29 a inlan aṭangin goal li chiah a khung.

Manchester United leh Monaco inbiak rem dan chuan United hian an duh a nih chuan pound maktaduai 43.2-in a nghetin an lalut thei ang. Mahse an beisei ang a goal a khung tam loh leh inhliam vanga a buai deuh avangin Louis van Gaal hian a la nghet duh ta lo a ni.

Kum 2013 khan French club Monaco chuan pound maktaduai 50-in Atletico Madrid aṭangin Falcao hi an lalut a, Spain club tan hian season hnih chhungin goal 70 a khung hman a ni. Falcao hi striker goal khung thei tak a ni ṭhin a, Portuguse club FC Porto tan pawh season hnih chhungin goal 72 lai a lo khung tawh bawk.

Chelsea hian striker rintlak Diego Costa nei mah se ani hi inhliam hrat leh nungchang mawi lo vanga hrem tawk zing ve tak a ni. Veteran striker kum 37-a upa Didier Drogba an chhuah tawh bawk avangin Blues hian tlarhma a awm tur dang an mamawh hle.

Season hmasa khan...

Chelsea striker Costa hi hliam neuh neuh vangin inkhelh theih loh zeuh zeuh chang a nei a, a club tan match khelh zawng zawng aṭanga chhutin 61% chiah a inlan.

Spain international Costa hian Chelsea tan Premier League minute 3,420 khelh theihna hun a neih aṭangin minute 2,082 chhung khelmual chhungah hun a hmang.

Nikum January thlaah a khup hliam avangin Colombian striker Falcao hian Man Utd tan match a khel lo nual. Premier League-ah minute 3,150 inlan theihna hun a neih aṭangin a club tan hian 40.8% chauh a inlan.

Cuadrado leh Falcao

Jose Mourinho-a'n tlarhmaah tunge a khelh tir ang? tih chu mi tam tak zawhna a ni nghal ang. Season hmasa EPL champion pui tu Costa hi chu a dam ṭha anih chuan lut chiang tura ngaih a ni. Hetihlai hian Colombia coach Jose Pekerman chuan a enkawl player pahnih Falcao leh Juan Cuadrado te chu Blues tan an inkawp rem a rin thu a lo sawi ve bawk.

Nikum January thlaa Fioren­tina aṭanga pound maktaduai 24 senga an lakluh Colombian winger Cuadrado hian Chlelsea tan match 13 inlan tawh mah se goal khat mah a la khung loh mai bakah a ṭhiante goal khung tur pawh ala siamsak lo.

Colombia team-a a enkawl player pahnih chungchang sawiin Pekerman chuan, "Anni pahnih hi hlawhtling takin Chelsea-ah an khel thei ang tih ka ring. An theihna leh thiamna ka hriatchian avangin an ṭhiante ṭanpui tur leh goal khung turin an ṭha tawk a ni," tiin Falcao leh Cuadrado te chungchang a sawi.