Hmeichhe World Cup Champion lai Japan an kal zel

Hmeichhe World Cup-ah champion lai Japan-in an khingpuite an la hneh fai vek a, nimin zing khan Ecuador chu 1-0 a hnehin tlawm hmel hmu lo in second round an lut.

He inkhela goal awm­chhun hi Chelsea striker hlui Yuki Ogimi chuan inkhel ṭan aṭanga minute nga na lekah a khung a, inkhel tawp thlenga goal dang lut tawh lo in Japan hmeichhe team-in hnehna an chang.

Africa aiawh Cameroon

Group C inkhel dangah Cameroon-in 2-1 a Switzerland hnehin Japan hnung an zui a, African hmeichhe team-te chet ṭhat lohna World Cup-ah second round an lut.

Inkhel ṭan aṭanga minute 24 na lekah Swiss hmeichhe team-in Ana-Maria Crnogorcevic goal thun hmangin hma an hruai a, chawlhlawk thlengin goal dang a lut tawh lo.

Mahse, second half-ah Cameroon tan Gabrielle Onguene leh Madeleine Ngono Mani te'n an siphurh rawn sutin 2-1 in Cameroon-in hnehna an chang a ni.

Hmeichhe World Cup hi group khatah team pali zel awmin group rukah ṭhen hran a ni. Group tin aṭangin a sang pahnih zelin second round an lut anga, group tina pathumna zinga a che ṭha zual paliin second round an lut thei ang. Hetiang dan hman a nih dawn avang hian Ecuador lo hneh tawhtu Switzerland tan second round luh beisei a la bo lo.

Beisei phak lo US an tlang

Hmeichhe World Cup-a vawi hnih lai lo champion tawh USA-in 1-0 in Nigeria an hneh hram a, vanneihthlak takin second round an lut.

Nilaini zinga inkhelah hian USA tan Abby Wambach chuan minute 45 naah a volley goal a, second half aṭanga kim lo a khel Nigeria lakah goal dang an khung belh thei lo. Nigeria player Sarah Nnodim chuan yellow card pahnih a hmuh avangin hnawhchhuah a ni.

Asian hmeichhe team chet ṭhatna World Cup-ah hian Australia pawn 1-1 a Sweden inhnehtawk puiin second round an lut. Inkhel ṭan aṭanga minute nga na lekah Assuie hmeichhe team tan captain Lisa De Vanna chuan goal hmahruai a khung. Sofia Jakobsson-i'n Sweden tan rawn sut ve leh mah se Australia tan a zawna vawi thum World Cup second round an luh nan draw result a tawk a, goal dang luh belh tawh loin tlang zawkah an ṭang ta a ni.