A ruka US thawhpuitu Chuck Blazer

US Department of Justice-in eiruk thubuai a siamsak mi 14 zinga tel CONCACAF general secretary hlui Chuck Blazer chuan a rukin FIFA chhuichiangtu US sorkar a lo thawhpui reng thu puanchhuah a ni.

Kum 70-a upa Blazer hi kum 2013 khan eiruk thubuai siamsak a lo ni tawh a, US court hmaah a diklohna hi puangin US sorkar hi a thawhpui nghal nia sawi a ni.

Mahse, tunhnaiah US media group lian zual panga in judge hnenah Blazer an thawhpuina tarlang turin an ngen a, US Soccer Federation president hlui hian kum 2011 December thla aṭang khan US sorkar hi a lo thawhpui tawh reng nia tarlan a ni.

Blazer leh US thawhdunna document hi phek 19 a chhah niin November 2013-ah thawhdunna hi sign a ni a, an thawhdun ṭan tak tak erawh December 2011 kha niin document hian a tarlang.

American pachal Blazer hi kum 1997-2003 chhung khan FIFA executive committee member niin FIFA thuruk tam tak hriat nan US sorkar hian a hmang a ni.