FIFA thubuai FIFA thawhpuitu NPC an inhnukdawk

Khawvel football-a thuneitu sang ber FIFA buaina in ziaawm lam a pan hleithei lo a, football kaltlanga remna tlangaupui tura an thawhpui Nobel Peace Center chu eiruk thubuaia FIFA mualphona avang hian thawhhona aṭangin an inhnukdawk.

NPC leh FIFA te hi 'Handshake for Peace' tih thupuia hmangin an thawk ho a, football kaltlanga remna leh muanna tlang­aupui chu thupui bera an neih a ni. An hmalakna ber pakhatah chuan remna tlangaupui tura inkhelh hma apianga team captain pahnih te in chibai a ni a, hei hian khawvel hmaah remna pawimawhzia a tlangaupuiah an ngai a ni.

FIFA lam erawh NPC inhnuhdawhna avang hian an lawm lo hle a, remna leh muanna puanzar kawnga an hmalakna leh vun rawng in ang loh vanga inthliarna thleng ṭhin ti reh tura an hmalakna kawngah NPC hmalakna hian nghawng na tak a neih an hlauhthawn thu an sawi.

President thar thlang thuai tura inbuatsaih mek FIFA chuan, "NPC thu­tlukna siam hi a lai lo hle a, remna leh muan­na tlangaupuina leh inhmuhsitna thleng ṭhin te tireh tura kan hmalakna kawng tam takah minti ṭhuanawp dawn a ni," a ti.

FIFA chuan an presi­dent kalchhuak tur Sepp Blatter leh NPC executive Bente Erichsen te pawn inbiakna an neih thu sawiin 'Handshake for Peace' chu NPC nen thawkho tawh lo mah se an kalpui zel tur thu an sawi.