Friendly Match Eder-a goal khat hmangin Portugal chak
Thawhlehni zan khan Portugal chuan Braga forward Eder-agoal khat thun hmangin friendly match-ah Italy chu 1-0 in an hneh.
Kum 39 hnua a vawi khat nan Italy hi an khelmual Stade de Geneve-ah Portugal lakah an tawm. Friendly match ni mah se record duhawm tak a ni hran lo ang. Italy hi nikum FIFA World Cup a Uruguay an hneh loh hnua an chak loh na hmasa ber a ni nghe nghe.
Real Madrid star Cristiano Ronaldo tel lohna team Portugal tan Porto winger Silvestre Varela chuan first half-ah hmahruaina goal khung ṭep mahse Italy tan Inter Milan defender Andrea Ranocchia chuan goal line aṭangin a lo pet chhuak hlauh.
Italy tan veteran goalkeeper Gianluigi Buffon aiah Salvatore Sirigu-a'n goal a veng. Friendly match a nih vangin inkhel a dul in goal chance a tam lo hle. Portugal hun ṭha berchu second half-ah rawn inher chhuakin Porto winger Ricardo Quaresma cross ṭha tak mai chu Eder chuan hnai set sawt aṭangin a tlawh lut. He goal bak hi munute 90 chhungin goal dang a luh belh tawh lo.
Manolo Gabbiadini leh Franco Vazquez te chuan an si phurh sut teuh viau mah se Portugal goalkeeper Beto-a'n a lo dan sak ve ve.
Braga striker Eder hian kum 2012 aṭang khan an ram tan khel tawhin match 17 a inlan tawh. Italy laka a goal khung hi a goal khatna chauh a ni.
Inrinni khan Portugal hian Euro qualifying-ah Armenia chu 3-2 a hnehin Group I hmahruaitu an ni mek. Tunhnai an match hnuhnung pasarih aṭangin Portugal hian vawi ruk hnehna an chang thei a ni.
Friendly match nimahsela FIFA hriatpuina hnuaia khelh a nih avangin Italy tan chuan an chak loh hi a pawi thui ang reng hle. Kum 2018 FIFA World Cup qualifying draw neih a nih hunah seeded an nih loh phah dawn a ni.
Inenfiah nan kan
hmang ang - Conte
Italy manager Antonio Conte chuan an mahni ram ngei a an chak lo chu ngaihthah theih a nih loh thu leh inenfiah nan an hman tur thu a sawi.
Juventus manager hlui Antonio Conte chuan, "Kan chak loh avangin kan chhe ta duai tihna a ni hran lo. Mahse keimahni ramah ngei kan chak loh avang erawh chuan in enfiah ngei kan ngai. Kan tihsual aṭang hian thil tam tak kan zir chhuah ngei ka beisei a, hmasawn nan kan hmang ang," tiin a sawi. Conte hian nikum FIFA World Cup zawh aṭang khan Italy hi enkawlin a vawi khat chak loh puina chiah a ni.
Italy hian an match leh hmasa ber chu September 3 khian Euro 2016 qualifying-ah Malta an hmachhhawn ang.