Aegon Championship aṭangin Nadal a tla
Thawhlehni tlai khan Rafael Nadal chun tun season-a a vawi hnih nan grass court tournament a khel a, mahse World number 79 Alexandr Dolgopolov hneh loin Aegon Championship first round-ah a tla.
Kar hmasa khan Nadal hian Mercedes Cup nomawi chawi mah se grass-ah beisei angin a khel ṭha chhunzawm lo. Spanish tennis star Nadal hian inkhel bul a ṭan ṭha lo hle a, a khingpui Dolgopolov-a'n a service chhuksak nghalin 6-3 in set a hloh nghal.
Set hnihnaah erawh Nadal a rawn ṭang mar ve leh deuh a, harsa angreng takin 6-7 (6-8) in set chu ala ve mai. Set thumna hmangin chak zawk zawn a ni a; 4-2 a hma hruai tu Nadal hi chak ngei tur a ngaih a ni hman tawh. Mahse Dolgopolov chuan game hnuhnung pali rawn la zawn vek in 6-4 in a rawn lehthal leh a ni.
Kum 29-a upa Nadal chuan, "Ka theih tawpin ka bei a, point vawi khat hmu tur pawh khan ka bei nasa thei hle. Chak turin ka dinhmun pawh a ṭha hman viau tawh a, mahse tennis-ah chuan duh angin thil hi a thleng vek thei lo fo," tiin a sawi.
Mipa inkhel dangah Andy Murray chuan tun season-a a grass court match hmasa ber khelin Chinese Taipei Yen-Hsun Lu chu darkar khat leh minute 19 chhungin 6-4, 7-5 in a hneh.
British chhuanvawr Murray hian second round-ah Fernando Verdasco a hmachhawn leh ang. He tournamnet-ah hian Murray hi seeded pakhatna anih bakah vawi thum a lo champion tawh.
French Open champion thar seeded pahnihna Stan Wawrinka pawh a chak a, a match hmasa berah Nick Kyrgios chu straight set 6-3, 6-4 in a hneh. Wawrinka hian set hnih la tur hian minute 50 chiah a mamawh a, set pahnihah Wawrinka hian a khingpui Kyrgios service vawi khat ve ve a chhuhsak a ni.