2015 NBA Champion Golden State Warriors

Second tlem te chauh a awm tawh a, chak tur a chian tawh avangin Golden State Warriors player bench lama awmte chuan champion an lawm ṭan a, Stephen Curry hawi chhuak chuan a lam pana LeBron James rawn phei chu a hmu a. Cleveland Cavaliers star-in Curry a kuah a, champion thar lawmpui bak chu tih theih a nei lo.

NBA Final Game 6-ah Warriors 105-97 in an chak a, Cavaliers lakah series 4-2 a lain kum 40 hnuah NBA champion an ni. Regular season-a Most Valuable Player atana thlan Curry a langsar a, NBA Final-a MVP Andre Iguodala a thawhhlawk a, head coach Steve Kerr a ropui. Chicago Bull vanglaia 3-pointer ṭha mi Kerr hian head coach a nih kum khatnaah Warriors a champion pui nghal.

Team Thawhrah

Warriors hi regular season-ah vawi 67 chakin league record thar an siam a, kum 1975 hnua champion nomawi chawi hi an phu an ni.

Warriors-in squad an nei chhah a, final-a player pawimawh chu Andre Iguodala leh Curry niin player pahnih hian Game 6-ah point 25 ve ve an score. Warriors coach Kerr-a'n Game 4-ah Iguodala hi starting lineup-ah a tel a, Curry chetṭhat chhanah pawh Final-a MVP hi a pawimawh hle.

Warriors forward Draymond Green-a'n Game 6-ah triple double neiin 16 points, 11 rebounds leh 10 assists a nei bawk. NBA Final final match zawng zawngah hian Cavs bench aiin Warriors bench an lut tam zawk. Warriors champion hi team thawhrah a ni.

James a nep lo

Champion zo ta lo mah se Cleve­land guard James dah hniam theih a ni lo. Game 6-ah hian James hian 32 points, 18 rebounds leh assists vawi ruk a nei a, final match-a player ṭha ber a ni tih a nemnghet.

LeBron James hian puitu a nei ṭha lo a, Cavs-in an player pawimawh Kyrie Irving leh Kevin Love an hman theih loh avangin final-a vawi hnih an chak thei ringawt pawh hi thil mak tak a ni.

Cavs guard J.R. Smith, Iman Shumpert leh Matthew Della­vedova ten chetṭhat ṭum an nei nachungin rinrawl bera hman atan chuan an la duap deuh.

Game 3 leh Game 4-a che ṭha Australian Dellavedova hi a champion thei tak loah chuan 'Delly­mania' a tawp a, Andrew Bogut hun a rawn inher chhuak. Warriors center Bogut hi Andrew Gaze, Luc Longley, Patty Mills leh Aron Baynes te hnua Australian NBA champion leh thei hmasa ber a ni.

Kerr a lawm

Warriors coach Kerr chuan, "He­tiang zan ka tawn lohna hi kum 12 a liamta, tun hi zan duhawm a ni. Kan vannei ve hrim hrim a ni. Ka inkhelh hun laiin Michael Jordan leh Tim Duncan te nen kan awm ho a, tunah Steph leh Klay te nen kan thawk ho leh bawk. Khawvela pa vannei ber ka ni," a ti.