Djokovic leh Alcaraz inhmachhawn thei dawn

Australian Open 2025 khelh dan tur pawh fel a ni tawh a, champion ngun ber Novak Djokovic leh tunlai player chhuak thar ṭha berte zinga mi Carlos Alcaraz te chu quarterfinal-ah an inhmachhawn thei dawn a ni.

Serbian star Djokovic hian a match hmasa berah Nishesh Basavareddy a hmachhawn dawn - American rawlthar hi wildcard hmanga inlan a ni a, vawi 10 champion tawh Djokovic tan paltlang a harsa vakin a rinawm loh.

Kum 37 mi Djokovic hi a coach thar Andy Murray nen an thawkdun chho mek a, tournament an hmachhawn dun hmasak ber turah result neih ṭhat an tum ang, anni pahnih hi Melbourne Park hrechiangtu an ni.

Djokovic tan hna a awlsam vek dawn bik lo, quarterfinal a thleng a nih chuan a kalkawngah Alcaraz a lo ding thei dawn - Spanish star Alcaraz hian a match hmasa berah Alexander Shevchenko a tum thung ang.

Tun hnai khan Alcaraz hian Grand Slam palia champion kim turin Australian Open title lak ngei a tum thu a lo sawi tawh, a hmain French Open, Wimbledon leh US Open nomawi a chawi vek tawh, tun ṭumah hian enbik hlawh zinga mi a ni dawn.

World number 1, seeded pakhatna leh champion lai ni bawk Jannik Sinner chuan a match hmasa berah Nicolas Jarry a hmachhawn thung dawn a ni, Italian tlangval hian nomawi hum ngei a tum dawn a, a tir aṭangin thapui a thawh nghal ang.

Seeded pahnihna Alexander Zverev chuan a bul ṭan nan wildcard hmanga inlan Lucas Pouille a tum dawn - German tlangval hi a chak chho zel a nih chuan, semifinal-ah Djokovic leh Alcaraz inkhel a chak zawk a tum thei dawn a ni.

Australian Open 2025-ah hian India tlangval Sumit Nagal pawh a inlan ve dawn - world number 96 Nagal hi Indian player zinga singles match khel phak awmchhun a ni ang, a match hmasa berah Tomas Machac a tum ang.

Tennis season khat chhunga Grand Slam hmasa ber - Australian Open khel phak hrim hrim hian, chak lo pawh ni se Rs 30,07,466 a hlawh phak tho a, main draw khel phak chin nih pawh thil hlu tak a ni.