FA Cup : Khawvela football inelna upa ber chu

Khawvela football inelna upa ber FA Cup chu zanin aṭangin third round khelh ṭan a ni dawn a, Premier League club-te an inlan ṭan dawn. Kum 154-a upa inelna hian ngaihhlut a hlawh ṭhin hle.

Season liam ta khan final-ah Manchester Derby hmuh a ni a, Erik ten Hag-a kaihhruai Manchester United chuan an hmelma Manchester City chu 2-1 a hnehin an champion. Chutihrualin FA Cup-a champion ngun ber erawh Arsenal niin vawi 14 an champion.

Kum 1872-a inelna ṭan a nih hnu khan nomawi panga siam a ni tawh a, inelna lian dang FIFA World Cup-ah pawh nomawi pahnih a awm tawh. A hmasa zawk chu Jules Rimet a ni a, a hnuhnung zawk chu Argentina kawl lai FIFA Trophy hi a ni.

1872 : Nomawi hmasa ber chu

Nomawi hmasa ber hi Sheffield-a tangkaraw chhertu Martin, Hall & Co te chuan £20-in an siam a, ‘little tin idol’ tih hming lem an pe.

A hun lai ngaihtuahin nomawi ṭha tak a ni a, kum 20 chuang zet chu hnehna changtu club-ten an inhlang chhawng zel. Kum 1895 khan Aston Villa an champion a, club chuan mipui hmuh thei turin Birmingham dawrah an chhawp chhuak. Mahse, helai dawr aṭangin ruk bo a ni a, hmuh a ni leh tawh lo.

Champion lai Villa chu FA Cup nomawi an tih bo avangin nomawi thlakna tur £25 chawitir hial an ni. Nomawi chawitu zel hi mawhphurtu an nih avangin chawitir awm reng an ni bawk.

Kum 1950 chhoah misual pakhat chuan journalist pakhat hnenah nomawi (tin idol) chu pawisa thir lem siam nana hman a nih thu a sawi a, mahse a thunsawi hi finfiah a ni lo.

Nomawi ber a bo miau avangin 1895/96 season tawp huna champion team chawi tur nomawi siam a ngai a, an siam zo hman lo a nih chuan champion team-in an thawhrimna avanga thil phochhuah tur an nei dawn lo.

1895 : A anpui chiah

An rukbo tak nomawi ang chiahin nomawi thar siam a ni a, kum 15 chhung an hmang. Kum 1909 khan Manchester United an champion a, a lawm nan a anpui ang chiah nomawi an siam.

Inelna buatsaihtu FA chuan nomawi design-ah thuneihna (copyright) an neih loh avangin Man United hmalakna hi dan kalh a ni lo. Hei vang hian nomawi design thlak turin thutlukna siam a ni.

Nomawi pahnihna hi tangkaraw chhertu Vaughton & Sons (Birmingham) te siam a ni a, anni hian London Olympics 1908-ah pawh medal an design. Amaherawhchu, hman zui a nih tak loh avangin nomawi hi FA president Lord Kinnaird hnenah pek a ni a, kum 2005 khan £420,000 in an lilam a, a changtute hian kum 2020 khan an hralh nawn.

1911 : Nomawi mawi zawk

Tun thlenga kan hmel hriat nomawi design thar chu chhawp chhuah a ni a, a hma aiin a lang hrawl zawk. Nomawi design-tu hi Bradford-a cheng lunghlu thawmhnaw siam chi (jeweller) Fattorini a ni a, 1911 Cup final chhawp chhuah theih turin a peih fel.

Nomawi san zawng hi 61.5 cm-a sang a ni a, nomawi panga zinga an hman rei ber a ni. Kum 1991 thleng an hmang a, season 81 chhung an hmang.

Kum 2016 khan Antiques Roadshow-ah nomawi hi pho chhuah a ni a, a hlutna hi pound maktaduai khat anga chhut a ni. Nomawi design expert Alastair Dickenson chuan FA Cup nomawi pathumna hi Fattorini-a ngaihtuah chhuah liau liau ni loin 'champagne cooler' hmel hmang aṭanga design a nih a rin thu sawi.

Engpawhchu ni se nomawi nalh tak a ni a, Bradford khawpui aṭanga chhuak a nih angin Bradford City thuneitute hnenah hlan a ni.

1992 : Nomawi thar

FA-in uluk takin a ngaihtuah a, nomawi thar chu a tlo zawk nan a anpui ang chiah siam ṭha a ti a, kum 1992 aṭangin nomawi thar hi an hmang ṭan. Nomawi thar siamtute hi Toye, Kenning leh Spencer-a hnathawkte an ni.

Nomawi hi mipui hmaah chhawp chhuah tam a ni a, daih rei tura ngaih ni mah se thlauh leh tauh chu a dawl bik lo. Nomawi an chawi hmasak ber aṭangin kum 22 chauh a daih.

2014 : An hmanlai mek

FA Cup hi a dahna hmunah a awm ngai meuh lo a, tunah hi chuan inelna tih lar nan school leh bazarna hmunpui angah te chhawp chhuah a ni ṭhin. Nomawi hi an dah chhuah tam avangin a lang chul hma hle.

Hei vang hian nomawi pangana siamtu Thomas Lyte chuan nomawi hi 1911 leh 1992-a an siam nen a san zawng ti inang chiah mah se 6.3 kg a rit a ni a, a hmaa mite aiin a rit zawk a, thlauh palh leh tauh palh pawh a dawl sawt ang.

FA Cup-ah hian nomawi panga hman a ni tawh a, nomawi thlak ṭhin mah se a dan erawh a la ngai reng. Champion team hian nomawi an nei lo a, FA aṭangin an hawh zawk chauh a ni. Nomawi an chawi zawh kum March 1 hmain an thehluh a ngai a, kar khat hriattirna pein FA-in an duh hunah an lalet thei bawk.