Potter hnuaiah West Ham inlan nghal dawn

West Ham chuan manager atan Brighton leh Chelsea boss hlui Graham Potter an lalut a, zanin dar 1:30 hian FA Cup third round-ah Aston Villa an hmachhawn nghal dawn.

Hammers hian league match 20 an khelh aṭangin point 23 chauh an hmu a, table-ah 14-naah an awm phak chauh avangin manager Julen Lopetegui an ban a, Potter-a hmabak a harsa nghal dawn hle.

Thla ruk chauh

Tun season Premier League manager zinga ban hmasak ber chu Erik Ten Hag a ni a, Ocotber 14, 2024 khan Man United-in an ban. Dutch manager an ban hian Man United hi 14-naah an awm mek a, Ruud van Nistelrooy-a'n hun rei lote chhung a enkawl hnuah Ruben Amorim an lalut.

Leicester City-in November 11. 2024-ah Steve Cooper an ban ve leh bawk a, Foxes hi 16-naah an awm mek. Amorim-a'n coaching staff-ah Nistelrooy a dah tel loh avangin Foxes-in Dutch manager hi manager nghet atan an lalut thung.

Wolves-in Gary O'Neil hnuaiah result an nei ṭha lo a, 19-naah an awm avangin December 15, 2024 khan O'Neil hi an ban a, December 19, 2024-ah Vítor Pereira an lalut.

Table mawngphaha awm Southampton pawhin O'Neil an ban ni vek hian Russell Martin an ban a, Simon Rusk-a'n hun rei lote chhung a enkawl hnuin December 2024 khan Ivan Juric an lalut.

West Ham pawhin Lopetegui chungah zahngaihna an lantir reng thei lo a, thla ruk hnuah an ban a, Spanish manager hi tun season-a Premier League manager an ban pangana a ni. Hammers hi 14-naah an awm mek a, Manchester United nen an point hmuh zat a inang mek.

Chelsea duh loh Potter

Graham Potter hian Brighton-ah hming a chher a, Seagulls a enkawl lai chuan duhtu pawh an ṭhahnem hle. English manager hian club lian Chelsea a pan a, hun rei a daih lo. April 2023-a Blues a chhuahsan hnuah Potter tan Hammers hi a hna hmasa ber a ni dawn.

Kum 49 mi Potter chuan, "West Ham ka enkawl thei hi ka lawm. Ka ril rem zawng club ka hmuh hma chu nghah ka thlang a, tunah chuan ka duh tak club ka hmuh tak avangin team enkawl hna ka ṭan leh dawn.

"Club nen kan inbiaknaah thawhrimna kan ngai pawimawh ve ve a, kan dinhmun siam ṭha turin rim takin hna kan thawk ang. Tun season-a kan hmasawnna tur kan thlir phawt ang a, chumi zawhah hun rei zawk kan thlir ang," tiin a sawi.

Todd Boehly-a'n Chelsea a lei hnua a manager lak hmasak ber chu Potter hi a hna a, thla sarih hnuah a ban. Blues hian Potter nei tur hian Brighton hnenah zângnadawm nan pound maktaduai 21 zet an pe. Heti taka manager atana sum an seng tam ngam chhan chu kum thum chhung Seagulls a enkawl a, a kum thumnaah game mawi khel chunga pakuana an nih phak vang a tih theih.

English manager hian Chelsea a enkawl hmain Ostersunds FK leh Swansea City te a kaihruai tawh a, West Ham hian Chelsea duh loh ni loin team khai chhuak thei tura theihna nei sanga an ngaih manager an laluta ngaih a dik zawk ang.

FA Cup chu...

West Ham-in Villa Park-ah Champions League khel pha Unai Emery enkawl Aston Villa an hmachhawn dawn a, Potter tan hmabak a harsa dawn hle. Harsatna belhchhah turin Villa hi hliam vangin an buai mek.

Stiker chhuanvawr Michail Antonio chu lirthei chesual avangin a enkawl mek a, a inkhelh theih leh hun tur pawh a hriat loh. Jarrod Bowen pawh February thla tawp lamah a kir hman dawn chauh a, Nice aṭanga an hawh Jean-Clair Todibo pawhin a khel thei dawn lo a, midfielder pawimawh Emerson Palmieri pawh hliam vangin a inlan loh a rinawm zawk.

Hammers hian an match hnuhnung pahnihah goal kua ngawt an chhuah a, chutihrualin team ṭha Manchester City (4-1) leh Liverpool (5-0) te an hmachhawn tih hriat a ṭha. West Ham-in an hneh hnuhnun ber chu league table mawngphaha awm Southampton an ni a, 1-0 in an hneh ṭawk. Chutihrualin Potter hote hian pressure an ngah dawn lo a, Villa laka hnehna an chang thei a nih chuan inrintawkna an ngah sawt ang.