Wolves defender thar Agbadou

Premier League club Wolves chuan defender Emmanuel Agbadou an lalut - Reims aṭanga Agbadou lalut tur hian pound maktaduai 16.6 an hmang a, kum li leh a chanve chhung atan inremna an ziak.

Kum 27 mi Agbadou-a leh Wolves inremna hi kum khat dang atana pawhsei theih a ni bawk a, ani an lakluh takah chuan Lens defender Kevin Danso lak an tumna chu an titawp zui ve nghal bawk ang.

Wolves sporting director Matt Hobbs chuan, "Emmanue hi kan mamawh leh duh chu a ni a, kan team min ti chak thei tur kan zawnna kawngah a chhanna chu amah hi a ni, kan inbiak tirh aṭangin thil a kaltluang hle," a ti.

EPL table hnuai lama talbuai lai Wolves hian nipui bazar lai khan an captain Max Kilman chu West Ham hnenah an hralh a, a hmunruak luah thei an la awm leh lo.

Ivory Coast interna-tional Agbadou hian Kilman hmunruak a luah thei tura beisei a ni a, tlarhnung lama an buaina pakhat chu an chingfel thei tura ngaih a ni.