Barca-in Super Cup final lut

Tun hnaia khelmual chhung leh pawna thawm duhawm lo nei reng Barcelona fan-ten lawmna tur an nei ve leh ta a, Spanish Super Cup-ah final an lut.

Catalan club hian Nilaini zan khan Copa del Rey champion Athletic Bilbao an hmachhawn a, 2-0 in an hneh. Barca tan Gavi chuan minute 17-naah goal hmahruai khungin, Lamine Yamal chuan minute 52-naah a belhchhah bawk.

Bilbao tan Inaki Williams chuan goal a khung veah inngai mah se, offside vangin pawmsak a ni lo a, Barca an chak - final-ah nizana Real Madrid leh Real Mallorca inkhela chak zawk an hmachhawn dawn a, result kan hre hman lo.

Barca-in khelmuala result lawmawm an neih hmain pawn lamah pawh thu lawmawm an nei a, tun hnaia Spanish Football Federation leh La Liga lamin season chawhnu atana an ziah luh theih loh tur thu an hrilh Dani Olmo leh Pau Victor te chu Barca squad-ah ziah luh an ni.

Catalan club hian nipui transfer lai khan player pahnih hi an lei a, mahse, an sum dinhmun a chhiat avangin season chawhma atan chauh an ziak lut thei. Season chawhnu atan ziah luh tum mah se, hun tiam chhunga an chinfel hman loh avangin an ziak lut lawk thei lo.

Court pahnihah zualkoin, hnawlsak an ni a, mahse, Spanish National Sports Council (CSD) lamah kal lehin, anni hian an phalsak. CSD hian thutlukna chiang erawh an la siam lo a, tuna Olmo leh Pau Victor ziah luh hi phalna lailawk a ni a, thutlukna chiang zawk an la siam leh ang.