Aizawl FC tan mangchhia bawk!

I League-ah Aizawl FC-in RG Stadium-ah inkhel bul ṭan ṭhin mah se a tawp an khar ṭha ṭhin lo - a zawn zatin vawi thum an chesual ta. January 9, Ningani zana Mizo club thil tawn hi hriatthiam a harsa a, chutihrualin an khingpui Sreenidi Deccan tan erawh 'comeback' ropui a ni thung.

Victor Lalbiakmawia hoten Lalbiakdika, Zothanpuia leh Lalrinzuala te hmangin goal an khung hmasa a, darkar khat a liam hnuah pawh 3-0 a la ni. Mahse, Sreenidi-in minute 69-na aṭangin si phurh an sut ṭan a, hun a tawp meuh chuan 4-3 a ni. Aizawl FC an vanduai a, an muala inkhel hnuhnung pathuma point 12 hmuh theih aṭangin point khat chiah an hlawh chhuak.

Danmawia'n bul a ṭan

Aizawl FC-in hliam leh hrem vangin captain Lalchhawnkima leh vice captain Lalruatthara te an chhawr thei lo a, defender pawimawh pahnih an awm loh avangin Hyderabad aṭanga loan hmanga an hawh Laldanmawia'n bul a ṭan nghal.

Coach Victor Lalbiakmawia'n starting eleven dang erawh a thlak meuh lo a, striker Lalhriatpuia aiah Lalrinzuala a ring zawk. Serchhip tlangval Rinzuala thlawp turin Augustine Lalrochana leh Lalbiakdika te an awm.

Midfield-ah hrem vanga match hnuhnung ber khel thei lo MPL11 best player Lalthankhuma a rawn kir a, Zothanpuia leh Lalawmpuia Sailo te nen an inkawp. Defence-ah Danmawia leh Lalhrezuala te inkawpin, Lalfelkima leh H. Lalrempuia te mualsirah an awm a, Joel B. Lalramchhana'n goal a veng.

Sreenidi lamah Mizo pathum B. Lalnuntluanga, Lalchungnunga Chhangte leh Lalromawia ten bul an ṭan a, khelmualah player 14 zet Mizo player an awm tihna a ni.

Penalty dangtu Ramchhana

Mizo hlanga khel chungin Mizo tlangvalte an zam bik lo a, budget nei sang Sreenidi Deccan lakah attacking football nen bul an an ṭan. Goal khung thiam Lalrinzuala'n mikhual team tlarhnung a tibuai nghal a, mah se Serchhip tlangval hian a hun ṭha hmasa hi a khung lo.

Tun season I League-a Mizo club goal nawrna ber Augustine pawh dinglam kilah a hlauhawm zel a, Vairengte tlangval hian angle zim tak aṭangin a khung teuh hle.

Mahse, Sreenidi striker David Castañeda-a'n box chhungah ball a chang a, keeper Ramchhana'n a tihtluk avangin penalty a chawi. Striker David-a'n hun ṭha a hlah a, minute 23-naah a penalty hmuh chu a pet over luah.

Goal thum chu

Aizawl FC an insiamrem a, Saitual tlangval Zothanpuia ball pek luh ṭha zet chu Lalbiakdika'n um lutin MPL11 top scorer, Champhai Zotlang tlangval hian mawi takin minute 37-naah keeper Ubaid pet khumin a pet goal.

Goal hmasa zawk siamtu Puipuia'n Brazilian defender Eli Sabiá ball chan lai chhuhsakin ama pualin minute 43-naah goal a khung. Halftime-ah 2-0 a ni a, second half ṭantirh lamah pawh Mizo club tho an che ṭha.

Minute 58-naah MPL11 final-a man of the match-a thlan Om Om-a'n midfield-ah rilru fim a pu a, vei lama awm BD-a a pe. Champhai Zotlang tlangval hian mahni hma sialna nei loin Rinzuala tan a pe a, Aizawl FC striker hian minute 58-naah goal thumna khung.

A mak, a na!

Mizo club-in chak turah an inngai a, goal luh zawh chiahah goal khungtu Rinzuala la chhuakin Lalhriatpuia an luhtir. Sreenidi lamin si phurh sut tumin defender Eli Sabia aiah striker William Alves de Oliveira an luhtir a, Chungnunga aiah amah ang bawka ball thiam R. Lalbiakliana an luhtir bakah second half ṭan chiahah Brandon VL Remdika an luhtir bawk.

Aizawl FC-in goal thum ngawtin hma hruai mah se Sreenidi an la beidawng lo, striker chhuanvawr David-a'n crossbar a rawn pet per. Mizo club an inthlahdah a, corner kick aṭangin goal an chhuah. Minute 69-naah corner aṭanga ball kal chu Brandon-a'n tauh pialin, Tluanga a tiper leh a, David-a'n goal-ah chantir.

Sreenidi-ah Mizo an ṭhahnem miau a, RG Stadium-ah Mizo club ai mahin anmahni ṭantu thawm a ring. Set piece hmangin bawkin Sreenidi-in goal an khung a, Ángel Orelien-a freekick pet chu David-a'n minute 75-naah a tauh lut.

Mizo club an buai takzet tawh a, Sreenidi an phur tulh tulh. Minute 83-naah vei lam aṭangin Angel Orelien-a cross chu William-a'n a tauh lut a, foreign player danglamna a lang a, Mizo tlarhnung a phui tawk lo ve bawk.

Chak tumin Sreenidi-in an nawr zel a, Biaktea'n a ke veilamin chakna goal a khung teuh hle. Mizo club an insiamṭha thei miau lo a, injury time-ah pawh minute kuanaah vei lam aṭanga Abhishek Ambekar cross chu David-a'n a tauh lut.

Mizo paruk awmna Sreenidi Deccan-in Mizo hlanga khel Aizawl FC lakah comeback ropui an lantir a, 4-3 in hnehna an chang. Mizo club tan erawh hriatthiam a harsa a, indawmkun hman erawh an ni lo. Aizawl FC hian January 12, Pathianni hian Raia Panchayat Ground-ah Churchill Brothers an hmachhawn lehnghal dawn.