Ronaldo-a'n a zawnin kum 24 chhung goal a khung tawh

Saudi Pro League 2024-25-ah Al Nassr chuan Ningani zan khan Al Akhdoud chu 3-1 in an hneh a, Al Awwal Park-a'n inkhelah hian Cristiano Ronaldo-a'n penalty aṭanga goal khungin Sadio Mane-a'n goal hnih a khung bawk. Portuguese forward hian inelna hrang hrangah goal 917 a khung tawh a, kum 2025-a a match hmasa bera goal a khung nghal avangin a zawn zatin kum 24 chhung goal a khung tawh.

Mane Show

Riyadh, Saudi Arabia-a inkhelah Al Akhdoud-in minute rukna lekah Saviour Godwin hmangin goal an khung nghal a, keeper Bento tan dan ngaihna a awm lo. Mahse, Al Nassr goal bawh a na a, Sadio Mane hmangin goal khung belhah inngai mah se cross ball a luh hmain ball-in line a pelh hman avangin pawm a ni lo.

Liverpool forward hlui Mane erawh dan reng thei a ni lo a, Mane hian Sultan Al-Ghannam ball tauh ṭhat zar zoin minute 29-naah siphurh a sut. Mane hian penalty a hlawhchhuak zui a, Ronaldo rawn pen chhuakin minute 42-naah keeper bumin hmahruaina goal a khung.

Second half-ah pawh Mane bawk a che ṭha a, a chance neih ṭhat hmasak khung thei lo mah se minute 88-naah Mane hian chak nemnghehna goal a khung. Al Nassr-in 3-1 in hnehna an chang a, table-ah point 28 hmuin pathumna ni mah se hmahruaitu Al Ittihad point riat ngawta an phak loh avangin um phak a harsa dawn.

Goal khungtu ropui

Kum 39 mi Cristiano Ronaldo-a'n goal a la khung chhunzawm zel a, Portuguese forward hian thla thar February 5 hian kum 40 a tling dawn. Ronaldo hian goal 1000 khung tling turin goal 83 chauh a mamawh tawh a, kum upa deuh tawh mah se mi bik a nih miau avangin record hlu bik hi a siam theih dan kawng a la awm.

Ronaldo danglamna chu a kum upa telh telh a, a ṭha tulh tulh emaw tih mai tur a ni. Kum 27 a nih khan goal 275 a khung a, kum 39 a nihin goal 917 a khung. A inkhelh hun chhungin chakna goal match 292-ah a khung a, a record hi a ropui hle.

Kum 30 a tlin hnua a goal khung zat mawlh hi chhuan tham a tling bawk. Ronaldo hian kum 30 a nih hnuah goal 454 a khung a, goal khungtu ropui dang Neymar (439), Raul (432), Ronaldo Nazario (414), Thierry Henry (413), David Villa (405), Ruud Van Nistelrooy (394), Didier Drogba (368) leh Wayne Rooney (466) te career chhung zawnga an goal khung aiin a tam zawk.

Saudi Pro League-ah Ronaldo hian match 60-ah goal 60 a khung thei a, assist vawi 15 a nei bawk. Saudi League history-a goal 60 khung tling thei upa ber a ni bawk.