Man City tan insiamrem hun

Pep Guardidola kaihhruai Manchester City-in kawng dik an zawh ṭan a, match zawnin hnehna an chang leh tawh. Zanin dar 11:15 hian FA Cup third round-ah League Two club Salford City an mikhual dawn a, City tan hna harsa a ni lo ang.

Salford hi kum 85-a upa a ni a, kum 2014 khan Manchester United player hlui Manchester United players Nicky Butt, Ryan Giggs, Gary Neville, Phil Neville, leh Paul Scholes bakah Singaporean sumdawng hausa Peter Lim ten an lei. United player hluite hian 10% ṭheuh neitu nihna an nei a, a bak zawng hi Lim-a chan a ni thung. Kum 2019 khan David Beckham-a'n Lim-a hnen aṭangin neitu nihna 10% a lei leh bawk.

Salford hian Class of 92 kaihhruaina hnuaiah nasa takin hma an sawn a, a hma chuan English football-a division riatna (NPL Division One North) ah an awm ṭhin a, tunah chuan League Two club an ni tawh a, division linaah an awm tawh tihna a ni. Chutihrualin an khingpui tur Man City erawh tun hnaia English football awptu an ni a, Salford tan an ṭha hret ang.

Nikum kum tawp lamah Man City an talbuai a, chak dan an theihnghilh tawh ang hialin ngaih theih mah se tunah chuan chak dan an thiam leh tawh a, Erling Haaland-a'n goal a khung leh ta bawk. Salford tan Premier League club ṭum thum an hmachhawnna a ni a, City hma hian Everton (3-0) leh Burnley (4-0) ten an hneh lo a, Premier League club lakah goal an la khung lo thung.

Team pahnih an inthlauh deuh vangin Pep Guardiola-a'n player a siksawi deuh a nih pawhin a mak lo ang. Hammers an sawp ṭumini Savinho-a'n goal khung lo mah se a langsar. Pep pawhin Jack Grealish aia training-naa tih ṭhat avangin Savinho a thlan zawk thu a sawi nghe nghe. Salford lakah erawh Grealish zawk pawh hi bul ṭan thei dinhmunah a ding a, chutihrualin January 14, Thawhlehni zana Brentford an hmachhawn tur atan ngaihtuahna an seng tel bawk ang.