Arsenal mualah Man United lut dawn

FA Cup third round khel turin Arsenal chuan Manchester United an lo mikhual dawn - Pathianni zan dar 8:30 hian Emirates Stadium-ah inkhel hmuhnawm chhawp chhuah a ni dawn a, zan inkhawm bana en nuam tawk tak a ni ang.

Football knockout tournament upa berah hian Arsenal hi vawi 13 an champion tawh, record nei ṭha ber an ni. Manchester United hian kuminah an nomawi an humhim thei a nih chuan, champion tam lamah Gunners an nih rual dawn a ni.

Chelsea chu zanin dar 8:30 hian an inlan dawn thung - Blues hian Morecambe an hmachhawn dawn, an khingpui tur hi League Two club an nih daih avangin Enzo Maresca-a'n a player ṭha hahchawlhtir chung pawhin hnehna a chan theih a rinawm.

Corner mawlh kha!

Emirates Stadium-a Man United an lenluh hnuhnung ber chu nikum December thlatir mai kha a la ni, coach thar Ruben Amorim-a naute 2-0 in an chak lo, an goal chhuah pahnih hi corner aṭanga ball kal an chinfel theih loh vanga lut a ni.

Amorim-a naute hian tun thlengin set piece ven dan an la thiam tawk lo, tun ṭumah hian chak an duh a nih chuan Gunners lamin corner leh freekick an pet lo ven dan an thiam a ngai dawn a, an tihsual aṭangin zirlai an zir ngei pawh a rinawm.

Tun hnai khan Theo Walcott chuan Arsenal chuan set piece an tuipui lutuk nia a hriat thu a sawi a, na taka goal nawr hmuhnawm tak ang kha an nei tlem ta niin a sawi - Arsenal forward hlui thusawi hi mi tam takin an ṭawmpui ngei ang.

Mikel Arteta naute hian tun hma lama Arsenal attacking game hmuhnawm ang kha an hloh mek a, vawi leh khata neih let thut theih erawh a ni lo ang - tun dinhmunah chuan set piece, a bik takin corner hi an hmanraw hlauhawm a ni rih.

Diallo awmna

Manchester United hian an match hnuhnung berah Liverpool chu 2-2 in an inhnehtawkpui - Premier League hmahruaitu laka point an hlawhchhuah theih avangin inrintawkna an neih san belh sawt ang tih a chiang.

Reds laka goal pawimawh khungtu Amad Diallo chuan tun hnai khan contract a ziak thar a, Diallo hian kum 2023 June thla thleng daih contract a ziak, tlarhma lama an hmawnraw hlauhawm berte zinga mi an thlungnghet hi an lawm khawp ang.

Ivory Coast international hian Reds lakah goal a khung a ni satliah lo, Manchester City an hnehna goal a khung tawh bawk - club lian leh inkhel boruak sang a ngam riau a, Arsenal tan pawh ven uluk ngai tur bik zinga mi a ni dawn.

Kum 22 mi Diallo chuan, "Min tin tan season harsa tak a ni tih chu ka hria, mahse kan hma lawkah hian thil lawmawm tak tawn tur kan neih ngei ka ring, kan team tana theihtawp chhuah turin ka inpeih tawh hle a ni," tiin a sawi.

Marcus Rashford erawh a dinhmun a chiang lo zel, an inkhelh loh chhan chu damlohna vang nia sawi ni mah se manager Amorim nen an inmil lo niin khawthlang chanchinbu rintlakte chuan an ziak a, thlasik bazar chhungin a chhuak a nih pawhin a mak lo ang.

Nomawi mamawh

Arsenal tan FA Cup hi thil thar a ni lo a, inelna dang aia champion an thiamna tia sawi ngam a ni. Chutihrualin, kum 2020 hnu lamah an la champion leh lo! FA Cup chauh ni loin, eng nomawi emaw ber chu an mamawh tih chu phat theih a ni lo.

An duh ber zawt ta ila Premier League title tia chhangtu an tam a rinawm, an la champion ngai lohna Champions League-ah an dinhmun a ṭha rih bawk - League Cup final lut tur erawhin tlang sang tak lawn chhuah ngai an nei tawh, a harsa tawh dawn.

Tuna a lan dan chuan Gunners tan FA Cup hi beisei neih san theihna ber niin a lang, chutihrualin champion tur chuan kawng zawh tur an nei thui hle a, lo champion ta tehreng pawh ni se la North London club ṭantute lawmna tak erawh a ni phak tawh kher lo ang.

Arteta enkawlna hnuaiah nasa takin hma an sawn a, an hmasawnna hian ram ropui erawh a la thlen thei lo. Spanish manager hian bazar nan sum a hmang hnem a, hun harsa aṭanga insawhngheh nan hun a nei rei tawk ta bawk.

Tun season tawpah Arsenal hian nomawi engmah an chawi lo a nih chuan, beiseina nena 'trust the process' ti ṭhinte zinga ngei pawh Arteta duhkhawp lo, manager thar neih mai duhtu an tam zualin a rinawm - boruak siam ṭha turin Man United hneh chu an hna pawimawh hmasa a ni.