Real-in Super Cup final-ah Barca hmachhawn dawn

Spanish Super Cup final-ah El Clasico kan hmu dawn - Ningani zan khan Real Madrid chuan 3-0 in Real Mallorca an sawp a, final-a Barcelona hmachhawn turin an inpettling.

Real tan Jude Bellingham, Martin Valjent (own goal) leh Rodrygo ten goal khet ṭheuh an khung a, Mallorca lamin a chhanletna tur an neih loh avangin Real an chak chiang.

Saudi Arabia-ah Supercopa de Espana hi khelh niin, Pathianni zan dar 12:30-ah final khelh a ni dawn a, Real leh Barca ten champion nih an inchuh dawn.

Spanish Super Cup-ah hian La Liga pakhatna leh pahnihna leh Copa del Rey finalist te an inhmachhawn a, a tawpah La Liga kaltlanga he inelna hmachhawntu Real leh Barca ten final an khel dawn ta.

Hey Jude!

Season ṭantirah beisei a phak loh avangin Bellingham-a'n sawisel a hlawh a, mahse, thlasik boruak kan hip meuh chuan Real tana player langsar ber ang hiala chhal ngam a ni leh tawh - Ningani zanah pawh goal hmahruai a khung.

Real hian first half chhung zawngin goal an khung lo a, minute 63-naah Bellingham a inlar. Rodrygo-a'n uiawm taka post tauh perin, a per lehlam chu Kylian Mbappe-a'n 'shot' mah se an lo dang nawn.

Mahse, Mallorca keeper Dominik Greif-a ball dan per hi Bellingham-a ke bulah a tla a, English midfielder hian a hlah ve tawh lo - goal-ah a chantir a, Real an phur phah sawt.

Bellingham-a'n Real tan a match hnuhnung pakuaa goal sarih a khungna chiah a ni a, tun season inelna hrang hrangah goal kua a khungna a ni bawk - match 23 a khel tawh a, assist vawi sarih a nei tel.

A tawp kharna

Real hian goal dang an khung belh lawk thei lo. Hun pek belh minute hnihnaah Brahim Diaz-a inlar a, minute 88-naa Vinicius Junior thlak tura lut hian Mbappe tan a siamsak a, mahse, French striker-in ball a dawn hmain Mallorca centre back Martin Valjent chuan an lamah a dang lut.

Real-in an la duhtawk lo cheu - Rodrygo hun a her chhuak. Brazilian forward hian Lucas Vazquez-a shot chu goal bul aṭangin, hnai set sawtah a pet goal a, 3-0 a ni.

Hun a tawp zui a, Real-in hnehna an chang a, final an lut. Inkhelh zawhah club pahnih player inkarah buaina tenau a chhuak a, thil pawi erawh a thleng lo.

Real boss Carlo Ancelotti chuan, "Buaina tihtawp tumin khelmualah ka lut a, player-te kha lawm lo viau mah se, a tawpah chuan engmah buaina liantham a awm lo," a ti.

Hmuaktu Barca

Real-in Super Cup final an lut a, Barca-in an lo hmuak. Real hian season hmasa khan Saudi-ah vek Barca hi final-ah 4-1 in an lo sawp tawh a, chak nawn an tum ang.

Tun season-ah pawh club pahnih hi league thlengin an inum na leh hle - vawi khat an inhmachhawn tawh a, Barcelona hian 4-0 ngawtin an sawp. Real tan a na a, a tlawm thlak ngawih ngawih.

Ancelotti-a'n Super Cup final-ah phuba lak a duh dawn a, Italian coach hian Barca lakah a team hi 'phuba' a lakpui thei a nih ngat chuan an phur sawt ang a, La Liga a ngaihnawm tel sawt ang.

Hetihrual hian tun hnaia result nei ṭha lo Barca tan Real hneh hi team infuihthar nana pawimawh tak a ni. Real an sawp hnuah khan league match riat khelin, vawi hnih chiah an chak a, vawi li ngawt an tlawm - league table-ah pawh pathumna an ni hram a, zanina Real hneh hi an tan beiseina thar siamtu a ni dawn.