Australian Open 2025: A ṭan niah Djokovic inlan dawn

Pathianni aṭangin Australian Open 2025 an khel ṭan dawn a, champion ngun ber Novak Djokovic chu a ni hmasa berah hian a inlan nghal dawn - wildcard hmanga inlan Nishesh Basavareddy nen an inkhel ang.

Grand Slam vawi 24 lai champion thei ni mah se, season hmasa khan Djokovic hian major title a la miah lo! Tun ṭumah hian seeded pasarihna a ni phak chauh a, champion tura rinkai ber anga sawi a rem bik lo.

Chutihrualin, Australian Open a nih tawh chuan Djokovic hi mipui ngaihven leh hmachhawn châkawm lo berte zinga mi chu a ni tho, vawi 10 a champion tawhna a nih miau avangin a mikhual dawn lo hle.

Djokovic-a coach Andy Murray chuan, "Novak hi ka hrechiang, kum 2006 aṭanga 2022 chhung khan vawi 36 ngawt kan inhmachhawn, chuvangin a rilru paukhauh dan leh tumruhzia chu ka hrechiang.

"Tun ṭumah pawh hian champion beiseina nei lo ni se la chuan a inlan lo ang, tournament a khel a nih chuan a sang ber thlen a tum ziah, a harsa dawn tih hre mah ila chutiang tur chuan kan inbuatsaih.

"Match hmasa ber aṭangin miten a chevel an ngaihven dawn a, tihsual a nei hlek a nih pawhin sawi zui a hlawh ang. Tawnhriat a neih tam tawhna hi a ṭangkai dawn a ni, mite sawi leh ngaihdan ang ni loin, nuam ti takin inkhel se ka duh," a ti.

Season hmasa mai khan Murray hian tennis a chawlhsan a, hun rei lote hnuah Djokovic nen an thawhdun tur thu hi an puang - Australian Open hi an pahniha tawnhriat an neih ṭhatna hmun a ni a, midang tan hmachhawn an châkawm loh ang.

Tournament ṭan ni hian champion lai Jannik Sinner pawh a inlan dawn, world number 1 leh seeded pakhatna ni bawk Sinner hian Nicolas Jarry a tum dawn.

Season hmasa lama Grand Slam title pahnih latu Carlos Alcaraz chuan Alexander Shevchenko hmangin inelna bul a ṭan thung dawn a ni.