Barca chungah Atletico lawm lo

Atletico Madrid chuan, tun hnaia Spain National Sports Council (CSD) in Barcelona player Dani Olmo leh Pau Victor chungchanga thutlukna an siam chu lungawi thlak loh an tih thu an sawi a, Barca leh CSD chunga an lawm lohna thuchhuah an siam hmiah!

Barca hian Olmo leh Victor te hi nipui transfer lai khan an la lut a, mahse, an sum dinhmun a chhiat avangin season chawhma atan chauh an ziak lut thei.

Season chawhnu atan ziah luh tum mah se, hun tiam chhunga an chinfel hman loh avangin Spanish football federation (RFEF) leh La Liga lamin ziah luh an phalsak tawh lo.

Barca hian player pahnih ziah luh tumin court pahnih an pan leh a, hei pawh hi hnawlsak an ni. Mahse, CSD lamah kal lehin anni hian an lo phalsak lailawk a, thutlukna chiang zawk erawh la siam leh tur a ni.

Atletico chuan thuchhuah siamin, "CSD thutlukna siam hi ngun takin kan ngaihtuah a, dan anga thil kalpui mek chu an thutlukna hian a tiderthawng a ni," an ti a, "Dan bawhchhiat a nih theih nan zau takin kawng an hawng a, hetiang a nih chuan fair taka inelna a tichhe vek dawn a ni," an ti.

Diego Simeone enkawl Atletico hi tun hnaiah an che ṭha hle. Inelna hrang hrangah match 13 zet a zawnin an chak tawh a, league-ah match sarih a zawna chak tawhin, hetih chhung hian goal 17 an khung a, an lamah goal nga chiah a lut.

Atletico hian Pathianni zan dar 8:45-ah Osasuna chu league match khel turin an mikhual dawn a, an chak chuan hmahruaitu Real Madrid lehpelin, league hmahruaitu an ni thei ang.